lot_reg/67-REV.usfm

\id REV
\ide UTF-8
\h Etaleyehina
\toc1 Etaleyehina
\toc2 Etaleyehina
\toc3 rev
\mt Etaleyehina
\c 1
\cl Angati 1
\p
\v 1 Ara ana etaleyehina ono Yesu Kristo an isyo Hollum jihonyi itahutaniere jyo lapiti honyi erre hun ofwonni adi ihalu kai. Ifak inyi anjelo honyi iramaniere erre huna jyo apit honyi Yoane.
\v 2 Yoane olo, inyi etamijanani olo nekyanita huno Hollum iko nettiyenita huno Yesu Kristo, ara dwo bu te erre daŋ hunya igonyu inyi.
\v 3 Ijara lya al ihenio’to hotomunoi iko hya hul itayiruni’to nekyanita huno nekiluna ana, ette ’tunana itajya hosi erre hun igyoroni dini, nyo ilyaha asaa an itasirunierek adi isi.
\p
\v 4 Ani Yoane, egyoro ni jyo eklesyahyen hattarik huno Asia. Ijara amehino hatawana jihatai iko nelik taji on ottu’to jyo lya ol owon’to ahana, many nya beryen, bwo ottu adi. Bwo fe ijara nelik taji on ottu’to jyo oloyirihyen hattarik hul owoni’to ihosyere kurus Hollum hatawana jihatai.
\v 5 Bwo fe ijara nelik taji hatawana jihatai on ottu’to jyo Yesu Kristo al ara’to etamijanani ol obeŋ’to ogesem bwo ara inyi oloŋeu tehiji hayak bwo fe inyi eleittok olo hobwok hutta fau. Ijara akwatan hatawana jyo lya ol omuno’to hohoi, nyo ohohi inyi hohoi t’eyyata hohoi ta nooto honyi.
\v 6 Bwo fe ihuhumak inyi hohoi awati honyi iko ahehumak jyo Hollum Monyonyi. Ijara akwatan iko adwaran hatawana jihonyi fur. Amen.
\p
\v 7 Imijyete, ottu adi inyi idisi bwo fe igonyuni adi oŋite wati daŋ inyi ara dwo bu hya hinya ocuhi’to inyi. Oyyoi adi awoi wati daŋ hutta fau te eram honyi. Arai nekyanita hunia ahode. Amen.
\v 8 Ojo Hobu Hollum, Ani Alafa iko Omega, on ojo etteri iko esidi, ani alya al awon’to ahana, many nya beryen, bwo attu adi ni. Ani Adwarani al agalik’to daŋ.
\p
\v 9 Ani Yoane illa hatai bwo eŋiŋarak ni ikatai te ettigemita bwo fe olobye iko nadihan hun owoni’to itwa Yesu. Awon nya ni iful on obolo an ifurani Patemo te eram ono nekyanita huno Hollum iko nettiyenita huno Yesu.
\v 10 Itafutak Oloyiri ol Olibo ani to oloŋ ono Hobu ette ni itaniŋuna to horwoŋ hoŋ etuk on okwat’to ihwa aforojo.
\v 11 Ojo inyi, Igyoroi iwaraga erre hun igonyu adi iye bwo fe ifak awaraga ania jyo eklesyahyen hattarik, isi huna: Efisa, Semuruna, Perugamona, Tiatira, Sarudi, Filadelufai, bwo fe Laodisia.
\v 12 Teyya afyala ni igonyuniere ŋai al ikyana’to jihoŋ. Al afyala ni egonyu ni allomohyen hattarik hun ihuhumi ta nayyel.
\v 13 Ihiji allomohyen huna egonyu ni obo al ara ihwa Lonyi tulo. Iyyafak inyi aboŋo on ohodo’to bwo fe iluro asuhe honyi ta aboŋo ono nayyel.
\v 14 Obwori ofir hou honyi bebe ihwa agutuny. Owoni oŋite honyi ihwa aŋadyefa hima.
\v 15 Owoni ejek honyi ihwa abilata on opipyak’to an ifuhye ihima bwo fe ara etiri hutuk honyi ihwa aryak arryai.
\v 16 Owoni elelyefi hattarik ihani iŋet honyi bwo fe to hutuk honyi ottu ademi on ofi’to bebe, bwo fe ara omom honyi ihwa oloŋ an afaŋ’to bebe.
\v 17 Ninya egonyu ni inyi akwaharo ni ihejek honyi ihwa atulo ol oye’to. Attati inyi iyyabana aani iŋet honyi jihoŋ ette jaran, Hebaŋ, ani etteri iko esidi.
\v 18 Ani bwo fe leswoni. Aye nya ni ati imijye, esu ni tulaŋ bwo fe awon ni iko eŋanyiti huno naye iko huno Hadese.
\v 19 Tania igyoroi erre hodwo igonyu iye bwo fe erre hun owoni’to ihwania iko erre hun idwoŋi adi ihalu.
\v 20 Igyoroi bwo fe awoyo hiram ono elelyefi hattarik hodwo igonyu iye ihani iŋet hoŋ bwo fe eram ono allomohyen hattarik huno nayyel. Arai elelyefi hattarik ihwa anjelohyen hulo eklesyahyen hattarik bwo fe arai allomohyen hattarik ihwa eklesyahyen hattarik.
\c 2
\cl Angati 2
\p
\v 1 Igyoroi jyo anjelo olo eklesya otto miji Efisa jo, Ikyana lya al inef’to elelyefi hattarik ihani iŋet honyi bwo fe adaha ihiji allomohyen hattarik huno nayyel, ojo:
\v 2 Amijak ni ehanita hoi bwo egyamita hoi ojo adihan taji hoi. Amijak ni ibeŋ iye iruk laati hul orrohojari’to bwo fe ikemyo iye laati hul ojori era isi efahatx ati inyurak iye agesemita hosi nyo obeŋi isi arai alefahat ahode.
\v 3 Amijak ni adihan taji hoi iko erre hun idihu iye ta afure hoŋ ta abyaŋan ilafuho iko ebwoyo.
\v 4 Ati awon ni iko eram abotye jihoi jo, ibeŋ iye ihwania imuno ani ihwa ninya imunori iye ani tetteri.
\v 5 Tania ogilu amaji an iwotyari iye hebeŋ iye ikwaharo bwo iloito ataji hoi kokwak ihaniere ehanita hunya ihanio iye. Kuyya ibeŋ iye iloit ataji hoi attu adi ni iyari allomo hoi addi to maji honyi.
\v 6 Owon eram abotye on oyyu jihoi jo, iliwari iye ehanita huno laati Nikalao bwo fe ni aliwari isi.
\v 7 Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen. Jyo lya al iyyala’to esyo adi ni jihonyi iŋiyere ayyani ono nesu on owon’to imaji Hollum.
\p
\v 8 Igyoroi jyo anjelo olo eklesya otto miji Semuruna jo, Ikyana lya al ara’to etteri iko esidi bwo fe ol oye’to ati inyyak isu, ojo:
\v 9 Amijak ni ettigemita hoi iko elocaŋ hoi, ati ira iye ahabarani. Amijak ni bwo fe agesemita huno laati hul ojori era isi hulo Yudea, ati arai isi aji ono Sitan, obyaŋara hulo Yudea.
\v 10 Hebaŋ ettigemita hun ofwonni adi. Imijye, ottu adi etisyahani ibironia omuk hulatai ibabus ikemyere itai, bwo fe owoni adi ettigemita jihatai to oŋitek ’tomon. Odihu on oyyu many liye bwo esyo adi ni jihoi egorya ono nesu an ilaman’to iyyafaniere ihou.
\v 11 Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen. Ati lya al iyyala’to obeŋ adi onyurak adyaha ta naye etarrihi.
\p
\v 12 Igyoroi jyo anjelo olo eklesya otto miji Perugamona jo, Ikyana lya ol owon’to iko ademi on ofi’to bebe, ojo:
\v 13 Amijak ni amaji an imanyari iye, inyi amaji ono akurus Sitan, ati igotyere iye afure hoŋ ta agolon bwo ibeŋ iye ibusak neruk hoi jihoŋ dwadi bu to oŋitek hunya ottohorik Antifasa ihiji hatai imaji an amanyari Sitan. Ara Antifasa ahetamijanani hoŋ iko amotte hoŋ ol oyyu’to.
\v 14 Ati awon ni iko omuk erre jihoi nyo owoni omuk laati ikoye hul iruhi nettiyenita huno Balama. Inyi alya al ittiyenio nya Balaka itipalyere laati hulo Israele jo oŋida isi oŋiye erre hun isyori jyo arrijorihyen bwo fe hehaniehe erre somon.
\v 15 Owoni bwo fe omuk laati jihoi hul iruhi ettiyenita huno laati Nikalao.
\v 16 Tania iloito ataji hoi. Kuyya ibeŋ iye iyito attu adi ni jihoi kokwak irryomoniere ikoye ta afere ono etuk hoŋ.
\v 17 Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen. Jyo lya al iyyala’to esyo adi ni jihonyi iŋiyere manaz an idimani, bwo fe esyo adi ni jihonyi amorwo on obwor’to, an ikyafani afure aŋejuk. Obeŋ obo atulo omijak afure ania arari lya al ifwotu’to inyi.
\p
\v 18 Igyoroi jyo anjelo olo eklesya otto miji Tiatira jo, Ikyana Lonyi Hollum erre huna, inyi alya ol owon iko oŋite ihwa aŋadyefa hima bwo fe arai ejek honyi ihwa abilata on opipyak’to.
\v 19 Ojo inyi: Amijak ni ehanita hoi iko namuno hoi. Amijak ni neruk hoi iko egyamita hoi bwo nadihan hoi. Amijak ni bwo fe jo oyiji egyamita hoi huttehalu agalihini huttohosyere.
\v 20 Ati awon ni iko obo eram jihoi jo idihu iye aŋotte Jesebele on ojo ara inyi ahiboni. Ittiyenio inyi bwo fe isusuyo apiti hoŋ ihaniere erre somon bwo fe iŋiyere aŋiyo an isyori te ehuma jyo arrijorihyen.
\v 21 Esyo nya ni asaa jihonyi iloicere ataji honyi ati obeŋ inyi awak iloit ataji honyi addi to hirre somon.
\v 22 Imijye, ebirok adi ni inyi ijotit iŋwari bwo fe ettigemyo adi ni hya hul ihanie erre somon ikonyi arari al iloiti isi atajya hosi addi t’eyyata hosi ikonyi.
\v 23 Attoho adi ni aduri honyi bwo fe omijani adi eklesyahyen daŋ jo ani alya attifyani igigilita iko atajya wati. Esyo adi ni jihatai daŋ ababo edumit ihwa osiruni egyamita hatai.
\v 24 Ati jyo hul omuk hutto miji Tiatira hul obeŋi iruhi ettiyenita hunia, abeŋ ni esyo jihosi obo efahi nyo obeŋi isi ijifatye erre hun ogoli’to huno Sitan.
\v 25 Ati ogolihina jyo erre hun owoni’to jihatai many attuniere ni.
\v 26 Bwo fe jyo lya al iyyala’to, al ihanio egyamita hoŋ many isidi, esyo adi ni jihonyi adwaran ilettohori aati daŋ hutta fau.
\v 27 Ilettohori adi inyi isi ta agolon ette ittattur isi ihwa ayyani on obor’to atobok honyi. Bwo fe ara adi adwaran honyi ihwa adwaran an isyo Monyoŋ jihoŋ.
\v 28 Bwo fe esyo adi ni jihonyi elelyef otto taŋatyo motye.
\v 29 Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen.
\c 3
\cl Angati 3
\p
\v 1 Igyoroi jyo anjelo olo eklesya otto miji Sarudi jo, Ikyana lya ol owon’to iko Oloyirihyen hattarik hulo Hollum iko elelyef hattarik ojo: Amijak ni ehanita hoi bwo fe ojori laati jo isu iye ati ibeŋ iye isu luŋa.
\v 2 Ihuma irrirrya bwo fe itagolo erre hun arasai’to nyo ilyahai isi atuhuno. Nyo abeŋ ni anyurak ayiji ono egyamita hoi ihosyere Hollum hoŋ ara dwo bu obo abotye.
\v 3 Tania ogilu ettiyenita hun ifwotu iye iko hun itaniŋu iye. Oduloi igigilo tesi bwo fe iloito ataji hoi. Kuyya ibeŋ iye ihum irrirrya, attu adi ni ihwa olohoho bwo ibeŋ adi iye imijak asaa an attuniere ni jihoi.
\v 4 Ati owoni omuk laati imiji Sarudi hul obeŋi itiboti aboŋojin hosi bwo fe osiruni isi idahari ikoŋ ta aboŋojin hun obwori’to.
\v 5 Lya al iyyala’to iyyafak adi aboŋojin hun obwori, bwo fe abeŋ adi ni efufuso afure honyi addi to buk ono nesu. Elyet adi ni afure honyi ihosyere Monyoŋ iko anjelohyen honyi.
\v 6 Lya ol owon’to iko ayyaha, ijara inyi hetaniŋu erre hun ikyana Oloyiri jyo eklesyahyen.
\p
\v 7 Igyoroi jyo anjelo olo eklesya otto miji Filadelufia jo, Ikyana lya ol olibo’to bwo fe obis; owon inyi bwo fe iko eŋanyit ono Davide; oremik inyi ŋa ekat bwo obeŋ tulo ihyanak, oremik inyi hyanana bwo obeŋ tulo aŋa.
\v 8 Ojo inyi: Amijak ni ehanita hoi. Imijye, aŋahi ni ekat ihosyere hoi an ittallik tulo ihyanana. Amijak ni omuta adwaran hoi ati igotyere iye nekyanita hoŋ bwo ibeŋ iye imwanak afure hoŋ.
\v 9 Imijye, owoni laati hulo Sitan hul ojori era isi Yudea ati ogesemi isi. Imijye, arrosok adi ni isi ifwonniere irigoŋori ihejek hoi bwo omijani adi isi jo amuno ni iye.
\p
\v 10 Igotyere iye nekyanita hoŋ ta adihan tania errirrya adi ni iye ta asaa ono esusuyo on ottu adi ikemyere laati daŋ hul amanyai ifau.
\v 11 Attu adi ni kokwak. Ogolik jyo erre hun owoni’to jihoi jo oŋida obo atulo obeŋ iyaro addi negorya hoi an ilaman’to an iyyafak iye ihou.
\v 12 Lya al iyyala’to ehanak adi ni ihwa alalai ihaji Hollum hoŋ bwo fe obeŋ adi inyi ojiŋu teyya ’tuŋ. Egyoro adi ni afure ono Hollum hoŋ jihonyi bwo afure ono amiji ono Hollum hoŋ, inyi Yerusalem aŋejuk an isuru’to t’edou jyo Hollum hoŋ, bwo fe egyoro adi ni afure hoŋ aŋejuk jihonyi.
\v 13 Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen.
\p
\v 14 Igyoroi jyo anjelo olo eklesya otto miji Laodisia jo, Ikyana lya al ara’to ahode bwo ara ahetamijanani ol oyyu ol obeŋ ogesem. Inyi lya al ara’to etteri hirre daŋ hunya oyyeu Hollum.
\v 15 Ojo inyi: Amijak ni ehanita hoi jo ibeŋ iye ilik kuyya bu inok. Oyyu dwo jihoŋ al ilik iye kuyya bu inok.
\v 16 Ati ira iye ihwa aari hun olului, ibeŋ iye ilik kuyya bu inok, tania amita adi ni iye addi to hutuk hoŋ.
\v 17 Ijo iye jo, Ani abarani, bwo awon ni iko ebariti, tania abeŋ ni awak obo ariŋ; ati ibeŋ iye imijak jo iwon iye iko ejiriŋita, afyahajita, elocaŋ, aŋodo, bwo fe iwon iye aŋaturoi.
\v 18 Ajo ni jihoi jo oŋida iye inyyaŋu nayyel jihoŋ an italibori to hima bwo ibara adi iye. Inyyaŋu aboŋojin hun obwori bwo iyyafak isi itihoniere ariri hwan hoi. Inyyaŋu ayyani bwo ofyotok ihoŋite hoi jo oŋida iye imijo.
\v 19 Esiŋyo ni bwo fe abahyo aduri daŋ hul amuno ni. Tania iloito ataji hoi bwo igyamai te efiriwa.
\v 20 Imijye, awotya ni ikat bwo fe ellilloŋo. Lya al itaniŋu’to etuk hoŋ bwo fe aŋahi ani ekat, ajiŋa adi ni iŋiyere ikonyi bwo fe inyi eŋiyo ikoŋ.
\v 21 Lya al iyyala’to etoŋo adi ikoŋ ikurus hoŋ ihwa inya eyyalari ni atto ni itoŋo iko Monyoŋ ikurus honyi.
\v 22 Lya ol owon’to iko ayyaha ijara inyi hetaniŋu erre hun ikyana Oloyiri jyo eklesyahyen.
\c 4
\cl Angati 4
\p
\v 1 Ihalu erre huna daŋ amijo ni bwo egonyu ni ekat an aŋa te dou bwo etaniŋu ni etuk inya ikyana’to jihoŋ tetteri ihwa ehutit forojo. Ojo inyi, Waŋ dini, bwo etahutak adi ni iye erre huno hofwonni’to.
\v 2 Teyya teyya itufutak Oloyiri ani bwo egonyu ni akurus te dou iko atulo al itoŋo’to dia.
\v 3 Iyyalu lya al itoŋo’to dia amorwo on opipyak’to iko on odo’to, bwo fe owon atolohe en egara an ikolok’to akurus.
\v 4 Owoni akurusi atomwana arrihai haŋwan iger kurus honyi bwo fe itoŋoi amarwak atomwana arrihai haŋwan ikurusi hunia. Iyyafani isi aboŋojin hun obwori bwo fe owoni agoryai huno nayyel hun ilamani’to ihosi hosi.
\v 5 Ofwonni emedehita hilai to kurus iko nekyanita iko etitta hide bwo fe ihosyere kurus owoni allomohyen hattarik hun owulori’to hun arai oloyirihyen hattarik hulo Hollum.
\v 6 Bwo fe ihosyere kurus owon aari on oŋettyo dee an afaŋ’to ihwa amiraya. Ikoloni eyyeti aŋwan hun isui’to akurus bwo owoni isi iger kurus. Olwaji oŋite hosi ihomomite iko ihorwoŋite.
\v 7 Ara eyyet etabotye an isu’to ihwa elemye, ara etarrihi ihwa atawwo, owon etahunihi iko omom ono atulo, bwo fe ara etaŋwani ihwa akilir an idarra’to.
\v 8 Owoni ewa ille jyo eyyeti aŋwan ababo hun isui, bwo olwaji oŋite hosi imasik daŋ bwo fe itwa hiwa hosi. Ta afanni daŋ iko ta arwe daŋ odulori isi ikyana ojori, Olibo, olibo, olibo Hobu Hollum Adwarani al agalik’to daŋ. Inyi lya ol owon’to ahana, many nya beryen, bwo ottu adi.
\p
\v 9 Isyorye eyyeti hun isui’to akwatan bwo etahabuyo iko ahumo jyo lya al itoŋo’to ikurus, inyi lya al isu’to fur.
\v 10 Attati amarwak atomwana arrihai haŋwan ruboho ifau ihosyere lya al itoŋo’to ikurus bwo fe itahabuye isi inyi nyo isu inyi fur. Ibironi isi agoryai hosi hun ilamani’to ihosyere kurus ojori,
\v 11 Hobu hohoi iko Hollum hohoi osiru jihoi Ifwotuniere akwatan iko etahabuyo bwo adwaran, Iye ayyani hirre daŋ Nyo iyyeu iye isi Ette isi wanan ta awahan hoi.
\c 5
\cl Angati 5
\p
\v 1 Ihalu erre huna egonyu ni abuk ihani iŋet ono lya al itoŋo’to ikurus, inyi abuk an igyoro itwa iko ihorwoŋ honyi bwo ihyana inyi ta arodonyita hattarik.
\v 2 Egonyu ni anjelo olottir al ikyana on okwat ojo, Ŋai ol osiru’to iŋayere abuk iko arodonyita honyi hattarik?
\v 3 Bwo obeŋ obo atulo te dou kuyya to fau kuyya bu towoyo fau oremik ŋa abuk dwadi bu imijyere inyi.
\v 4 Ayyo ni bebe nyo obeŋi onyurani obo ol osiru iŋayere abuk kuyya bu imijyere inyi.
\v 5 Attati amarwani obo jaran jihoŋ ojo, Heyyo, imijye Elemye otto woyo ba Yuda, inyi Addeti olo Davide, iyyala inyi erre daŋ tania oremik inyi ŋa abuk iko arodonyita honyi hattarik.
\v 6 Bwo ihiji kurus iko eyyeti aŋwan hun isui’to egonyu ni Lonyo ker ol owotya iger marwak. Ara inyi ihwa aker ol ottohori te ehuma bwo owon inyi iko amwarrak hattarik bwo oŋite hattarik hun arai’to oloyirihyen hattarik hulo Hollum hul ifahini ifauhyen daŋ.
\v 7 Ottu inyi iduhuniere abuk to hani iŋet ono lya al itoŋo’to ikurus.
\v 8 Al iduhu inyi abuk orubohoi eyyeti aŋwan hun isui’to iko amarwak atomwana arrihai haŋwan ihosyere Lonyo ker. Owoni isi daŋ ababo iko adori bwo asahani hun ara’to ayyel hun ifuti iko arya hun arai’to emojiti huno aati Hollum.
\v 9 Ette isi dolo afure aŋejuk ojori, Isiru iye iduhuniere abuk, Bwo iŋayere arodonyita honyi hattarik Nyo ottohori nya iye bwo fe ta nooto hoi Inyyaŋak iye aati jyo Hollum. Ofwonni isi to woi wati daŋ, t’ekyanita wati daŋ gele gele, to lobyehyen daŋ iko to fauhyen daŋ.
\q1
\v 10 Ihuhumak iye isi olobye iko ehumak hulo Hollum hohoi Bwo itamanyaye adi isi laati hutta fau.
\p
\v 11 Amijo ni bwo etaniŋu ni edolita anjelohyen arryai hul ikoloni akurus bwo eyyeti hun isui’to iko amarwak. Arai isi alif ’tomon bwo omuk arryai, arryai.
\v 12 Ikyanai isi on okwat bebe ojori, Osiru Lonyo ker linya ottohori Ifwotuniere adwaran iko ebariti, ofyoro, agolon, Etahabuyo, akwatan iko namuno.
\p
\v 13 Etaniŋu ni bwo fe nekyanita huno neyyeti daŋ hun owoni’to idou iko ifau, bwo fe hun owoni’to iwoyo fau iko erre daŋ hun owoni’to ihari ojori, Ijara amuno iko etahabuyo, akwatan iko adwaran Hatawana jyo lya al itoŋo’to ikurus Bwo fe jyo Lonyo ker fur.
\p
\v 14 Ette eyyeti aŋwan hun isui’to jaran, Amen. Orubohoi amarwak ifau itahabuyere lya al amanya’to fur.
\c 6
\cl Angati 6
\p
\v 1 Egonyu ni Lonyo ker al aŋayo arodonyi etabotye jyo huno hattarik bwo fe etaniŋu ni eloŋo ono eyyet abotye tehiji eyyeti aŋwan hun isui’to. Ara eloŋo honyi ihwa etitta hide on ojo, Waŋ.
\v 2 Amijo ni bwo egonyu ni akusan on obwor bwo inef lya al itoŋo’to ihorwoŋ honyi narraŋ. Isyori jihonyi egorya iyyafaniere ihou bwo olo inyi iyyalari laati.
\v 3 Enyyak ni igonyuna inyi aŋayo arodonyi etarrihi ette ni itaniŋuna eyyet etarrihi an isu’to on ojo, Waŋ.
\v 4 Ottu akusan obo on odo. Isyori adwaran jyo lya al itoŋo’to ihorwoŋ honyi iyari nelik tajya addi to fau jo oŋida laati ottohye illarak hosi bwo isyori jihonyi ademi eneittok.
\v 5 Aŋa inyi bwo fe arodonyi etahunihi ette ni itaniŋuna eyyet etahunihi an isu’to on ojo, Waŋ. Bwo egonyu ni akusan en emoli bwo inef lya al itoŋo’to ihorwoŋ honyi ekemit ihani honyi.
\v 6 Etaniŋu fe ni obo etuk ikyana ihiji eyyeti aŋwan hun isui’to ojo, Inyyaŋai arotol abotye ono ema ta arobia abotye, bwo fe inyyaŋai arotol hunihoi huno aful ta arobia abotye ati hetarroho eyali kuyya bu aari ajalaŋi.
\v 7 Aŋa inyi arodonyi etaŋwani ette ni itaniŋuna eyyet etaŋwani an isu’to ojo, Waŋ.
\v 8 Bwo egonyu ni akusan an iryok’to kai, bwo anya afure ono lya al itoŋo’to ihorwoŋ honyi Naye, bwo ijifatyo Hadese ehalu honyi. Isyori adwaran iko elaballok jihosi jyo aŋati etaŋwani ono afau ittohyere laati ta afere iko ta ahure, te eŋwati iko ta acaŋi hun ifiriwaji’to hutta fau.
\p
\v 9 Aŋa inyi fe arodonyi etamiete ette ni igonyuna iwoyo itityek laati hunya ottohori ta neruk hosi jyo nekyana Hollum, bwo fe te etamijana hosi erre huna.
\v 10 Oyyoi isi on okwat ojori, Hobu hohoi, leittok, ololibo iko elahode, baya adi iŋot iye bwo inienu laati hul amanyai’to ifau ta attohoro hosi hohoi?
\v 11 Attati isyarana jihosi daŋ ababo aboŋojin hun obwori, bwo ojori jihosi jo oŋida isi odihuni kai many ottubanierek apiti hunya igyamai’to ikosi bwo illarak hosi, nyo ottohori adi bwo fe isi ihwo nya.
\p
\v 12 Aŋa inyi arodonyi etaleji ette ni igonyuna afau ikikiro bebe nyo iryok oloŋ ihwa aboŋo en emoli bwo odo ayafa ahoto.
\v 13 Okwahunie elelyefi hutte dou ifau, ihwa odouni aŋer ŋaboli hun hobeŋi’to odori al ohuco oyyami on obolo’to.
\v 14 Itabuhoni edou ihwa aboŋo on obubunani, bwo ihuti adonyok daŋ iko nafuli daŋ addi to masik hosi.
\v 15 Attati hobwok hulo afau iko eleittaha bwo eleittaha oseŋer idimana ahwattek hosi inomi iko ihiji morwoi hutto doŋyok. Idimai bwo fe abarak bwo olottiri bwo laati daŋ hul arai apiti iko hul obeŋi’to ipitoi.
\v 16 Illilloŋoi isi jyo adoŋyok iko amorwoi ojori, Okwahuniete ihwattek hohoi bwo idimana hohoi to homom lya al itoŋo’to ikurus iko to jore ono Lonyo ker;
\v 17 nyo afany oloŋ ono najore hosi bwo, ŋai adi oremik wotya?
\c 7
\cl Angati 7
\p
\v 1 Ihalu erre hunia egonyu ni anjelohyen aŋwan hul owotyai’to jyo aŋaco aŋwan huno afau bwo inefi isi oyyami hutto ŋaco aŋwan huno afau, jo oŋida oyyami obeŋ ohuco ifau, kuyya ihari, kuyya bu iyyanio.
\v 2 Egonyu ni anjelo obo ol ottu’to t’ettedwoŋi holoŋ ol owon iko aridinyi ono Hollum leswoni. Itakwat inyi etuk honyi ette loŋuna anjelohyen aŋwan hun owoni iko adwaran itarrohojyere afau iko aari:
\v 3 ette jaran jihosi ojo, Hetarrohojata afau kuyya aari, kuyya bu ayyanio many eridinyaniere hohoi apiti hulo Hollum hohoi aridinyi ihomomite hosi.
\v 4 Etaniŋu ni ehenio huno hya hul oridinyi, arai isi alif esiha abotye iko atomwana aŋwan haŋwan. Oridinyuni isi to woi Israele daŋ;
\v 5 alif ’tomon harrihai to woyo Yuda; alif ’tomon harrihai to woyo Rubena; alif ’tomon harrihai to woyo Gada;
\v 6 alif ’tomon harrihai to woyo Asera; alif ’tomon harrihai to woyo Nafatali; alif ’tomon harrihai to woyo Manasa,
\v 7 alif ’tomon harrihai to woyo Simeona; alif ’tomon harrihai to woyo Levi; alif ’tomon harrihai to woyo Isakara;
\v 8 alif ’tomon harrihai to woyo Sebuluna; alif ’tomon harrihai to woyo Yosefo; alif ’tomon harrihai to woyo Benjamino.
\p
\v 9 Ihalu erre hunia egonyu ni eluluŋ wati arryai bwo ittallik obo atulo ihenuna isi. Ottubanie isi to fauhyen daŋ, to woi wati daŋ, to lobyehyen daŋ iko t’ekyanita wati daŋ gele gele. Attati isi wotya ihosyere kurus iko ihosyere Lonyo ker. Iyyafani isi aboŋojin hun obwori bwo fe iniafatie isi atanata ’yanio ihas hosi.
\v 10 Iwuwoŋitai isi on okwat bebe ette jaran, Ottu etalahuna jyo Hollum hohoi al itoŋo’to ikurus bwo fe iko jyo Lonyo ker.
\v 11 Owotyai anjelohyen daŋ iger kurus bwo fe iger marwak iko eyyeti aŋwan hun isui’to, attati isi ruboho ihosyere kurus ette itahabuyo Hollum,
\v 12 ette jaran, Amen. Ijara amuno iko akwatan, ofyoro, ahumo, etahabuyo, adwaran bwo fe agolon hatawana jyo Hollum hohoi fur tulaŋ. Amen.
\p
\v 13 Efiyo ani obo amarwani ojo, Haŋai hulo hul iyyafani’to aboŋojin hun obwori bwo ofwonni isi tai?
\v 14 Ajo ni jihonyi jo, Hobu, imijak iye. Ette inyi jaran jihoŋ ojo, Ofwonni hulo t’ettigemyo on obolo bebe bwo fe illillai isi aboŋojin hosi italiboryere isi to nooto ono Lonyo ker.
\v 15 Tania owoni isi ihosyere kurus Hollum bwo fe igyamai isi jihonyi ihaji honyi ta afanni iko ta arwe daŋ. Imuhok adi lya al itoŋo’to ikurus isi ta abali honyi.
\v 16 Obeŋi adi isi inyyahi niama, kuyya bu ibwotoi, obeŋ adi oloŋ oswak isi kuyya bu obo anahan.
\v 17 Ara adi Lonyo ker ol owotya’to ihosyere kurus aheyyahani hosi bwo fe orihoro adi inyi isi jyo olotilihi huno naari hun isui’to. Bwo fe ifufuso adi Hollum neyyo daŋ addi to hoŋite hosi.
\c 8
\cl Angati 8
\p
\v 1 Ihwania laŋa inyi arodonyi etahattarihi odwahinie erre daŋ hutte dou ta anus saa.
\v 2 Egonyu ni anjelohyen hattarik hul owotyai ihosyere Hollum bwo fe isyori jihosi aforojohyen hattarik.
\v 3 Ottu anjelo obo ette wotya iger itityek bwo owon inyi iko akos an ara ayyel bwo isyori jihonyi ottogoŋ iharwahiniere iko emojiti liborok hutto hide tityek on orrohini ta ayyel on owon’to ihosyere kurus.
\v 4 Iharutoi emojiti liborok iko ottogoŋ ette afuro hosi dahan to hani anjelo jyo Hollum.
\v 5 Attati anjelo iduhuna akos ette itafutana inyi iko eema otto tityek ette lwahara inyi afau. Teyya teyya owon etitta hide iko nekyanita iko emedehita hilai bwo ekikiro fau.
\p
\v 6 Ihwania owoni anjelohyen hattarik iko aforojohyen hosi hattarik bwo itterye isi ahuta.
\v 7 Ohut anjelo etabotye aforojo honyi bwo fe ilwahari ifau afalaŋa iko eema hun iharutoi’to iko nooto, ette aŋati etahunihi ono afau swaharo iko aŋati etahunihi ono ayyanio, oswaharo bwo fe amiaŋ daŋ.
\v 8 Ohut anjelo etarrihi aforojo honyi bwo ibironi ihari obo ariŋ an ara’to ihwa adoŋe on owulo’to, ette aŋati etahunihi ono aari rahan ahoto.
\v 9 Oye aŋati etahunihi ono aham hun isui’to hun owoni’to ihari bwo fe itatturi aŋati etahunihi ono ababuri.
\v 10 Ohut anjelo etahunihi aforojo honyi ette elelyef on obolo’to bebe on owulo’to ihwa arwa douna t’edou. Odohi inyi jyo aŋati etahunihi ono aryak iko olotilihi.
\v 11 Anya afure elelyef ania Hiyyeri ette aŋati etahunihi ono aryak rahan ahiyyeri bwo oyei laati arryai hul amatai’to aari hwa nyo odwari isi.
\v 12 Ohut anjelo etaŋwani aforojo honyi bwo fe itaye aŋati etahunihi ono oloŋ, iko aŋati etahunihi ono ayafa, bwo fe aŋati etahunihi ono elelyefi. Iryohi aŋaco hosi hunia; iryok aŋati etahunihi ono oloŋ bwo fe ono attari.
\p
\v 13 Amijo ni bwo etaniŋu ni akilir an idarra’to idou an amala ojo, Orroho, orroho, orroho adi bebe jyo laati hul amanyai’to ifau al ohutai anjelohyen hunihoi hul arasai’to.
\c 9
\cl Angati 9
\p
\v 1 Ohut anjelo etamieti aforojo honyi bwo egonyu ni elelyef on odou t’edou ifau bwo isyori jihonyi eŋanyit ono ewure on obeŋ iko esidi.
\v 2 Ette inyi ŋa ewure ania bwo odok afuro teyya ihwa eema hiti. Itiryok afuro ania oloŋ iko oyyami.
\v 3 Ottu namaa to furo ania ifau bwo isyori jihosi adwaran ihwa eŋorit hitoni.
\v 4 Bwo fe iramani jihosi jo oŋida isi obeŋi itarrohoji amiyaŋ otto fau kuyya erre hun isuruni’to, kuyya bu ayyani. Oremehini isi itarroho laati hama hul obeŋi’to iko aridinyi ono Hollum to homomite hosi.
\v 5 Obeŋ adwaran jihosi ittohyere laati ati ittigemye isi laati ta adyaha on obolo bebe ta ayafajin miet. Bwo ara adyaha hosi ihwa eŋorit hitoni.
\v 6 To oŋitek hunia ottifyai adi laati naye ati obeŋi isi onyurani, bwo awahi adi isi iyeri ati olito naye jihosi.
\v 7 Arai namaa hunia ihwa akusani hun ihuhumani ta arrem. Owoni erre ihosi hosi hun arai ihwa agoryai huno nayyel bwo iyyalarai omomite hosi ihwa laati.
\v 8 Owoni isi iko ofir ihwa huno aŋorwo bwo fe iyyalarai alla hosi iko huno elemyo.
\v 9 Owoni bwo fe abilat hun ogoli’to bebe isuhyara hosi. Ara netiri ono ewa hosi ihwa atoromilehyen iko akusani arryai hun oŋeri’to irrem.
\v 10 Owoni amaa hunia iko alisajin ihwa huno atone bwo fe owoni ayilita jihosi. Owon adwaran ilisajin hosi ittigemyere laati ta ayafajin miet.
\v 11 Owon hobu jihosi, inyi anjelo olo ewure on obeŋ iko esidi. Afure honyi te ekyana Ebrei anya Abadon bwo te ekyana Grik anya Apolon on ojo Etatturoni.
\p
\v 12 Atuhuno arrohoji etabotye. Imijye, bwo ofwonni adi arrohojita arrihai.
\p
\v 13 Ohut anjelo etaleji aforojo honyi bwo etaniŋu ni etuk on ottu’to to mwarrak aŋwan huno etityek ono nayyel ottohosyere Hollum.
\v 14 Ette inyi jaran jyo anjelo etaleji ol owon’to iko aforojo ojo, Ohohi anjelohyen aŋwan hul ifitani iger hari eneittok an anya’to Efarate.
\v 15 Tania ohohini anjelohyen aŋwan hul itilai te eŋa iko oloŋ bwo asaa honyi on onyimuni ittohyere aŋati etahunihi ono laati.
\v 16 Etaniŋu ni ehenio ono oseŋer hul adahai’to ta akusani, arai isi alif ’tomon enyyahita alif ’tomon iko omuk arryai.
\v 17 Egonyu ni akusani iko hya hul itoŋoi’to ihorwoŋite hosi hul owoni iko alibat hun ibuyai isuhyara hosi; odo obo iko obo an egara, bwo obo ihwa ayyel. Iyyalarai osi kusani ihwa osi lemyo bwo to hutuhye hosi ottu eema iko afuro bwo anahan.
\v 18 Ottohori aŋati etahunihi ono laati te ettigemita huna hunihoi, isi eema iko afuro bwo anahan, hun ofwonni to hutuhye kusani.
\v 19 Owon adwaran ihutuhye kusani iko ilisajin hosi. Arai alisajin hosi ihwa amunok hun owoni iko osi hun itarrohojye’to laati.
\v 20 Ati laati hul obeŋi ottohori te ettigemita hunia, ihari isi iloicere atajya hosi addi to hirre hun ihuhumani isi ta ahas hosi. Ihari abusana etahabuyo ono ajok, iko arrijorihyen hun ihuhumani ta nayyel, ta abilat, ta amorwoi, iko ta neyyek. Obeŋi arrijorihyen hunia omijye, bwo obeŋi isi itaniŋye, obeŋi bu adahai.
\v 21 Ihari isi iloicere atajya hosi addi jyo ettohiti hosi, amurotye hosi, esomiti hosi, iko jyo ahoholita hosi.
\c 10
\cl Angati 10
\p
\v 1 Egonyu ni anjelo obo ol ogol bebe isuri t’edou. Ilurok edis inyi ihwa aboŋo bwo fe owon atolohe ihou honyi. Iyyalaro omom honyi ihwa oloŋ bwo arai ejek honyi ihwa eema on owulo’to.
\v 2 Inef inyi abuk on omuta’to bwo aŋa ihani honyi. Oryehi inyi eju iŋet honyi ihari bwo eju ihorroŋ ilotifor.
\v 3 Okwat neloŋo honyi bebe ihwa elemye al amala’to. Illilloŋo inyi ette etitta hide hattarik itir.
\v 4 Al itiri etitta hide hattarik ajo ni egyoro, ati etaniŋu ni etuk t’edou ojo, Idimak erre hun ikyanai etitta hide hattarik, hegyoro isi.
\v 5 Ihalamak anjelo odwo egonyu ni owotya ihari iko ilotifor aani honyi idou,
\v 6 ette inyi illama to lya al isu’to fur; inyi lya ol oyyeu’to edou iko erre daŋ hun owoni’to dia, oyyeu inyi bwo fe afau iko erre honyi daŋ, oyyeu inyi aari iko erre honyi daŋ. Ojo inyi attuba asaa nyo
\v 7 to noloŋ on ohut adi anjelo etahattarihi aforojo honyi itafutani adi erre hunya idimani huno Hollum ihwa itahutak nya inyi jyo apiti honyi leyak sayyo.
\p
\v 8 Inyyak etuk odwo etaniŋu ni t’edou ikyana jihoŋ ette jaran, Owon abuk an aŋa’to ihani anjelo ol owotya ihari iko ilotifor; ilo, iduhu inyi.
\v 9 Ette ni leten jyo anjelo ette mojo jihonyi abuk on omuta’to. Ojo inyi jihoŋ, Hibe, olumok abuk ana. Ofifil adi inyi to hutuk hoi ihwa nesyo ati odwa adi inyi to hohe hoi.
\v 10 Efwotu ni abuk to hani anjelo ette lumonia inyi. Ofifil inyi bebe to hutuk hoŋ ihwa nesyo, ati adilo ni inyi odwa inyi to hohe hoŋ.
\v 11 Attati isi jaran jihoŋ jo, Oŋida inyyak iye ikiluna to olobyehyen arryai, ta afauhyen, ta nekyanita wati daŋ gele gele iko to hobwok.
\c 11
\cl Angati 11
\p
\v 1 Teyya isyori jihoŋ ekemit an ara’to ihwa osiholoti ette etuk ikyana jihoŋ ojo, Odyotoi, okemye amaji on odwa’to ihaji Hollum iko etityek. Ihyana bwo fe laati hul itahabuye’to dia.
\v 2 Ati hekemyo eloŋoni on owon’to ilet iger maji on odwa’to nyo isyori inyi jyo paganohyen, bwo fe iriryeye adi isi te ejek hosi amaji on odwa’to ta ayafajin atomwana aŋwan harrihai.
\v 3 Esyo adi ni adwaran jyo etamijanak hoŋ arrihai ikiluniere to oŋitek alif abotye iko esiha arrihai iko atomwana ille bwo fe iyyafani adi isi aswali.
\v 4 Arai etamijanak hulo ihwa ayyani liwa bwo fe ihwa allomohyen arrihai hul owotyai ihosyere Hobu olo afau.
\v 5 Kuyya awak obo atulo itarroho isi, ottu adi eema to hutuhye hosi itatturyere am yorok hosi. Kuyya awak obo atulo itarroho isi, oye adi inyi ihwo nya.
\v 6 Owon adwaran jihosi ihyananiere edou itihyere ahide to oŋitek hun ikiluni isi. Owoni isi iko adwaran iloicere aari ahoto bwo fe ibahyere afau te ettigemita arryai ihwa awahi isi.
\v 7 Al atuhunie etamijanita hosi ottu adi acaŋ te wure on obeŋ iko esidi irremyere isi ette ’yalara isi ette ’tohoro.
\v 8 Oferi ahwattek hosi hun oyei’to ikoi miji on obolo’to, inyi amiji ninya isihonierek Hobu hosi. Orrijori amiji ania iko Sodoma bwo Masir.
\v 9 Ofwonni adi laati imijyere ahwattek hosi hun oyei’to to oŋitek hunihoi iko anus bwo ihari adi isi inuhaniere isi. Ofwonni adi laati to lobyehyen, to woi wati daŋ, t’ekyanita wati daŋ gele gele iko to fauhyen daŋ.
\v 10 Omu noi adi laati daŋ hul amanyai ifau ta aye hosi. Ohyai adi isi bwo isyorye esyorita jyo mottyarak hosi, nyo ittigemye nya etamijanak arrihai laati hul amanyai ifau.
\v 11 Ihalu oŋitek hunihoi iko anus ojiŋak oloyiri ono nesu on ottu’to jyo Hollum ihwattek hetamijanak ette isi wotya te ejek hosi, bwo ottu abaŋi on obolo bebe jyo laati hul igonyuni’to isi.
\v 12 Itaniŋuni etamijanak etuk on okwat bebe t’edou on ojo jihosi, Ifwanna dini. Ette isi dahan idou te edis bwo idororoi amyorok hosi isi.
\v 13 Ta asaa ania ikikiro afau bebe bwo okwaharo aŋati itattomoni ono amiji ania. Te ekikiro fau oyei laati alif hattarik bwo fe abaŋi laati bebe hul arasai’to ette isi isyarana etahabuyo jyo Hollum ette dou.
\p
\v 14 Atuhuno arrohoji etarrihi. Imijye, arrohoji etahunihi on ottu kokwak.
\p
\v 15 Ohut anjelo etahattarihi aforojo honyi attati etuhe hutte dou ikyana on okwat ojori, Ihwania ottu olobye ono afau ana rahan olobye ono Hobu hohoi ono onyimoto honyi bwo odulo adi inyi a Hobu fur.
\v 16 Orubohoi amarwak atomwana arrihai haŋwan hul itoŋoi’to ikurusi hosi ihosyere Hollum itahabuyere inyi,
\v 17 ette isi jaran, Esyarak hohoi ahumo jihoi Hobu Hollum Adwarani al agalik’to daŋ, Iwon nya iye bwo herasa iye ahana. Esyarak hohoi ahumo jihoi nyo ilettohori iye ta adwaran hoi on obolo’to.
\q1
\v 18 Iloŋojitai laati hutta fau Ati ihwania ottu ajore hoi, Iko asaa hoi iŋocere layak, Bwo idumari apiti hoi, isi leyak sayyo iko aati Hollum, Bwo hya hul abaŋi’to afure hoi, hul omutari iko hul obolori, Bwo fe itattur adi iye hya hul itatturi’to afau.
\p
\v 19 Attati amaji on odwa’to ono Hollum ŋa te dou, ette asenuk ono emwara leyo jyo amaji ania. Teyya teyya ofwonni emedehita hilai, etitta hide, ekikiro fau bwo fe afalaŋa hun obolori’to.
\c 12
\cl Angati 12
\p
\v 1 Oleyo etamijani on obolo’to bebe t’edou. Owon aŋotte an iyyafak oloŋ ihwa aboŋo bwo owon ayafa iwoyo hejek honyi. Iyyafak inyi egorya ono elelyefi ’tomon harrihai ihou honyi.
\v 2 Oyedu inyi ette inyi ’yo te eburaŋatyo ono esyo.
\v 3 Inyyak etamijani obo leyo t’edou. Imijye, ottu amunu on obolo bebe bwo odo. Owon inyi iko osi hattarik bwo amwarrak ’tomon bwo fe owoni agoryai hattarik ihosi honyi.
\v 4 Okuro alisa honyi aŋati etahunihi ono elelyefi hutte dou ette sulana isi ifau. Bwo owotya amunu odwo ihosyere aŋotte an ilyaha’to esyo, nyo awak inyi diloro eito al isiuni.
\v 5 Isiu inyi eito ’le, inyi alya al ilettohori adi aati daŋ hutte fau ta agolon. Attati eito alya kafana jyo Hollum ikurus honyi,
\v 6 ati ofuho aŋotte imur jyo amaji an ihuhumak Hollum tenyi, bwo dia itaŋiyo adi Hollum inyi oŋitek alif abotye iko esiha arrihai iko atomwana ille.
\p
\v 7 Owon arrem idou. Mikelele iko anjelohyen honyi orrem iko amunu on obolo’to. Bwo fe amunu ania iko anjelohyen honyi orrem iko Mikelele,
\v 8 ati obeŋ amunu iyyala isi tania obeŋ obo amaji jihonyi te dou.
\v 9 Ette isi bironia amunu ifau. Ara inyi amunu ninya beryen an anya’to Etisyahani bwo fe anya Sitan, inyi enyabani ono afauhyen daŋ. Ibironi inyi ifau iko anjelohyen honyi daŋ.
\v 10 Bwo fe etaniŋu ni etuk on okwat t’edou ojo, Ihwania attu etalahuna iko adwaran iko olobye ono Hollum hohoi. Attu bwo fe elaballok ono Kristo nyo ibirori dwo etisyahani addi, inyi etisyahani ono illarak hohoi an itisyaha’to isi ihosyere Hollum hohoi ta afanni iko ta arwe daŋ.
\q1
\v 11 Iyyalari isi inyi ta nooto ono Lonyo ker bwo te etamijani hosi an ikyanarik isi, nyo obeŋi isi omunoi nesu hosi dwadi ta asaa ono naye.
\q1
\v 12 Tania ijara edohwo omunoi iko hya hul amanyai’to dia. Orroho bebe jyo afau iko aari nyo afany etisyahani jihosi ta ajore on obolo nyo omijak inyi omutari asahyen hun arasai’to tenyi.
\p
\v 13 Al igonyu amunu odwo jo ibirori inyi ifau, olo inyi ittittifyari aŋotte ninya isiu’to eito ’le.
\v 14 Ati isyori jyo aŋotte ewa arrihai ihwa huno akilir eneittok jo oŋida inyi idarra tohosyere munu addi many jyo amaji honyi imur. Itaŋiyo adi Hollum inyi dia ta aŋasi hunihoi iko anus.
\v 15 Ette amunu mitara aari to hutuk honyi te ehalu aŋotte ania ihwa ebulyo hari, jo oŋida aari owororo inyi addi.
\v 16 Ati olwak afau aŋotte ania ette ŋa ewure honyi idiluniere ebulyo hari on ottu’to to hutuk munu.
\v 17 Tania ijorya amunu bebe jyo aŋotte ania ette inyi leten irryomoniere iko aduri ŋotte hul ijifatye’to nefahita huno Hollum bwo fe iko hul ogolihini’to jyo etamijani ono Yesu.
\v 18 Owotia nyia anyamanit ania ilotifor hari enne ittokon.
\c 13
\cl Angati 13
\p
\v 1 Awotya ni ilotifor hari ette ni igonyuna acaŋ ottu addi to hari. Owon inyi iko amwarrak ’tomon bwo osi hattarik. Owoni agoryai ’tomon imwarrak honyi bwo fe igyoroni emoriti ihosi honyi.
\v 2 Iyyalaru acaŋ an egonyu ni ihwa aworu bwo owoni ejek honyi ihwa ejek huno aŋumar bwo etuk honyi ihwa elemye. Isyo amunu on obolo’to adwaran honyi jyo acaŋ iko akurus honyi itoŋori. Isyo inyi bwo fe elaballok on obolo’to jihonyi.
\v 3 Egonyu ni ahou honyi abotye iko atoŋosa on ojo attoho inyi ati aŋida inyi. Illillihai laati daŋ hutta fau ette jifaru acaŋ ania.
\v 4 Itahabuye laati amunu nyo isyo inyi adwaran honyi jyo acaŋ. Itahabuye bwo fe isi acaŋ ette jaran, ngai ol orryamari’to iko acaŋ? ngai ol oremik’to ’rem ikonyi?
\v 5 Bwo fe isyori jyo acaŋ ikyanari erre huno etadara iko huno nemoriti. Isyori jihonyi bwo fe ilettohori laati ta ayafajin atomwana aŋwan harrihai.
\v 6 Aŋa inyi etuk honyi imoryere Hollum, bwo omoryo inyi afure Hollum iko aji honyi, ara dwo bu hya hul amanyai’to idou.
\v 7 Isyori bwo fe jihonyi irryomoniere iko aati Hollum ette iyyalara isi, ette inyi ilettohori awoi wati daŋ, olobyehyen daŋ, nekyanita wati daŋ gele gele, iko afauhyen daŋ.
\v 8 Itahabuye adi laati daŋ hul amanyai ifau inyi, isi hya hunya obeŋi igyoroni afureta hosi ibuk ono nesu many t’etteri fau. Inyi abuk ono Lonyo ker linya ottorhori.
\v 9 Lya ol owon iko ayyaha ijara inyi hetaniŋu.
\v 10 Kuyya igyoroni efita jyo obo atulo ifitani adi inyi ahode, bwo kuyya igyoroni attohoro obo ta ademi, ottohori adi inyi ta ademi ahode. Italeyeuni erre huna adihan iko neruk ono aati Hollum.
\p
\v 11 Egonyu ni acaŋ obo ojiŋu to fau. Owon inyi iko amwarrak arrihai ihwa lonyo ker bwo amala inyi ihwa amunu.
\v 12 Owon inyi iko edwariti daŋ huno acaŋ etabotye ette inyi itahutana edwariti hunia ihosyere honyi. Bwo fe orrosyo inyi afau iko laati hul amanyai ifau itahabuyere acaŋ etabotye ninya owon’to iko atoŋosa on ojo attoho inyi ati aŋida inyi.
\v 13 Ihanio acaŋ etarrihi ellillihita hun obolori’to, dwadi bu ta adwaran honyi itadou inyi eema t’edou many ifau ihosyere wati.
\v 14 Inyobyo inyi hya hul amanyai’to ifau te ellillihita hunya isyori jihonyi ihaniere ihosyere caŋ. Attati inyi jaran jyo laati jo oŋida isi ohololuni arrijori ono acaŋ ninya ocuhi ta ademi ati hesu inyi.
\v 15 Isyori adwaran jyo acaŋ etarrihi isyaraniere nesu jyo arrijori ono acaŋ etabotye, jo oŋida arrijori ania ikyana bwo fe ottohori adi laati daŋ hul obeŋi’to itahabuye arrijori ono acaŋ.
\v 16 Bwo orrosyo inyi laati daŋ ifwotuniere aridinyi ihas iŋeti hosi kuyya bu ihomomite hosi. Arai isi laati lasai iko eleittaha, laati abarak iko alocaŋak, laati hul arai’to apiti iko hul obeŋi’to arai apiti.
\v 17 Obeŋ obo atulo oremik inyyaŋa kuyya bu itinyyaŋari erre arari al owon aridinyi jihonyi. Ara aridinyi ania afure ono acaŋ kuyya bu anamba ono afure honyi.
\v 18 Awak eram ana ofyoro. Lya ol owon iko ofyoro ijara inyi ihenio anamba ono acaŋ, nyo ara inyi anamba ono atulo; inyi ana esiha ille iko atomwana ille heille.
\c 14
\cl Angati 14
\p
\v 1 Ihalu amijo ni ette igonyuna Lonyo ker ol owotya idoŋe Sion. Owoni laati ikonyi alif eshiha abotye iko atomwana aŋwan haŋwan hul owoni iko afure honyi bwo afure Monyonyi ihomomite hosi.
\v 2 Etaniŋu ni etuk an ikyana t’edou an ara ihwa etiri haryak arryai bwo fe ihwa etitta hide on okwat. Ara inyi bwo fe ihwa laati hul irribye adori hosi.
\v 3 Idoloi isi afure aŋejuk ihosyere kurus iko eyyeti aŋwan hun isui’to bwo fe ihosyere marwak. Obeŋ obo atulo oremik idolo afure ania arari laati alif esiha abotye iko atomwana aŋwan haŋwan hunya italahunie’to to fau.
\v 4 Isi hya hinya obeŋi owoni iko aŋorwo. Olibori isi ihwa odwoti on hobeŋ’to ottironie iko obo alle. Isi hya hul ijifatye’to Lonyo ker imasik daŋ hun alari inyi. Inyyaŋuni hulo t’ehiji wati irari ahaŋer loŋehwa hulo Hollum iko Lonyo ker.
\v 5 Obeŋ nya obo agesemi ihutuhe hosi. Obeŋ obo epali jihosi.
\p
\v 6 Ihalu egonyu ni anjelo obo idarra idou bwo owon inyi iko asayyo hun oyiji’to hun odulori’to fur iramyere jyo laati hul amanyai’to ifau; isi awoi wati daŋ, nekyanita wati daŋ gele gele, iko olobyehyen daŋ.
\v 7 Ikyana inyi on okwat bebe ojo, Abaŋata Hollum, isyatta akwatan jihonyi, nyo attu asaa ono aŋoco honyi. Itahabuyete lya ol oyyeu’to edou iko afau, bwo aari iko olotilihi.
\v 8 Ijifatyo anjelo etarrihi inyi ette jaran, Akwaharo, akwaharo Babolona amiji eneittok. Itamat nya inyi laati hutta fauhyen daŋ aari ajalaŋi hun arai’to esomiti honyi.
\v 9 Ijifatyo anjelo etahunihi isi ette jaran te etuk on okwat ojo, Lya al itahabuyo’to acaŋ iko arrijori honyi bwo ifwotu aridinyi ihomom honyi kuyya bu ihani honyi,
\v 10 amat adi inyi aari ajalaŋi hun arai’to ajore Hollum hun obeŋi iharutoi iko aari. Amat adi inyi to kos ono neloŋojita Hollum. Ittigemye adi amatani te eema iko anahan ihosyere anjelohyen hul olibori bwo fe ihosyere Lonyo Ker.
\v 11 Odok afuro ono ettigemita hosi bwo ittulak fur. Obeŋ obo ayiri jihosi ta afanni iko ta attari. Isi hya hul itahabuye acaŋ iko arrijori honyi bwo hul ifwotuni aridinyi ono afure honyi.
\v 12 Italeyeuni erre huna adihan ono aati Hollum, isi hya hul ogotyerek’to nefahita Hollum iko neruk jyo Yesu.
\v 13 Etaniŋu ni etuk ikyana t’edou ojo, Igyoroi jo, Ijara hya hul oyei’to ta neruk jyo Hobu hotomunohi ta asaa ana many fur. Ojo Oloyiri, Ara ahode, ijara isi oyiri t’egyamita hosi nyo ijifatye ehanita hosi isi.
\p
\v 14 Ihalu ana amijo ni ette igonyuna edis on obwor bwo itoŋo obo atulo dia al iyyalu Lonyi tulo. Owon egorya ono nayyel ihou honyi bwo owon ademi on ofi’to ihani honyi.
\v 15 Ojiŋu anjelo obo to maji on odwa’to ette iloŋo on okwat jyo lya al itoŋo’to idis ette jaran, Iduhu ademi hoi bwo odyoŋoi ema nyo odo amana otto fau bwo afany asaa ono adyoŋo.
\v 16 Tania ette lya al itoŋo’to idis ibironia ademi honyi ifau ette afau dyoŋoro.
\v 17 Ojiŋu anjelo obo to maji on odwa’to ette dou ol owon bwo fe iko ademi on ofi.
\v 18 Ojiŋu obo anjelo bwo fe t’etityek ol owon iko adwaran ono eema, ette inyi loŋo on okwat jyo anjelo ol owon iko ademi on ofi’to ette jaran, Iduhu ademi hoi, oŋoce ajalaŋi hutta fau nyo adori aŋer hosi.
\v 19 Attati anjelo ibironia ademi honyi ifau ette ’tubana aŋer ajalaŋi iwure on omocerek isi, an ara ihwa ajore Hollum.
\v 20 Omoce isi aari haŋer ajalaŋi iler miji ette nooto ’tuna teyya ette dilonia ilohoho kusani bwo fe oŋer many amail esiha arrihai.
\c 15
\cl Angati 15
\p
\v 1 Egonyu ni etamijani obo te dou on obolo bwo fe oyyu. Owoni anjelohyen hattarik iko ettigemita hattarik hun arai’to esidi, nyo tesi otuhuno adi ajore Hollum.
\p
\v 2 Egonyu ni obo ariŋ an ara’to ihwa aari eneittok on oŋettyo dee an iharuto iko eema, bwo iger honyi owotyai laati hul iyyalari’to acaŋ iko arrijori honyi bwo anamba ono afure honyi. Owoni adori huno Hollum jihosi.
\v 3 Idoloi isi afure ono Mose apit olo Hollum bwo fe idoloi isi afure ono Lonyo ker, ojori, Obolori ehanita hoi bwo oyiji, Hobu Hollum Adwarani al agalik’to daŋ. Obisi ekota hoi bwo arai isi ahode, Iye Hobu olo afauhyen daŋ.
\q1
\v 4 Hobu, ŋai adi ol obeŋ abaŋ afure hoi bwo obeŋ itahabuyo iye? Nyo iye hama ilibo. Ofwonni adi laati daŋ itahabuyere ihosyere hoi, Nyo oleye ehanita hoi hun obisi’to.
\p
\v 5 Ihalu erre huna amijo ni ette igonyuna amaji on odwa’to aŋa, inyi amusyama an ara’to etamijani ette dou.
\v 6 Bwo fe ojiŋuni anjelohyen hattarik hul owoni iko ettigemita hattarik. Iyyafani isi aboŋojin hun obwori bwo opipyahi, bwo fe iluroni asuhyara hosi ta aboŋojin huno nayyel.
\v 7 Obo tehiji ’yeti aŋwan hun isui’to isyo jyo anjelohyen hattarik asahani hattarik hun ihuhumi ta nayyel hun ifuti iko ajore Hollum al isu’to fur.
\v 8 Ifut amaji on odwa’to iko afuro on ottu’to to kwatan Hollum iko to dwaran honyi, bwo obeŋ tulo oremik jiŋana jyo amaji ania many otuhunierek ettigemita hattarik huno anjelohyen hattarik.
\c 16
\cl Angati 16
\p
\v 1 Etaniŋu ni etuk on okwat an ikyana to maji on odwa’to jyo anjelohyen hattarik ojo, Ifwatta, ijuhoro ifau erre hutto sahani hattarik huno ajore Hollum.
\v 2 Ette anjelo etabotye leten, ette juhoro ifau erre hutto sahan honyi. Attati atoŋos hun orrohoji’to bwo fe odyahai ifwanna ihwattek wati hul owoni iko etamijani ono acaŋ, iko jyo hya hul itahabuye arrijori honyi.
\v 3 Ijuhok anjelo etarrihi erre hutto sahan honyi ihari ette aari rahan ahoto, ihwa nooto ono layani ette erre daŋ hun isui’to ihari ye.
\v 4 Ijuhok anjelo etahunihi erre hutto sahan honyi jyo arryak iko olotilihi hari ette isi rahan ahoto.
\v 5 Etaniŋu ni anjelo olo arryak ojo, Ibis iye te eŋotiti hoi hunia. Iwon nya iye bwo herasa iye ahana. Ira iye Ahaliboroni.
\v 6 Nyo itawouni nya laati nooto ono aati Hollum iko ono eyak sayyo bwo isyo iye attok hulya nooto imatari. Osiru ana tesi.
\v 7 Bwo fe etaniŋu ni nekyana on ottu’to t’etityek ojo, Afe, Hobu Hollum Adwarani al agalik daŋ, obisi eŋotiti hoi bwo arai isi ahode.
\v 8 Ijuhok anjelo etaŋwani erre hutto sahan honyi iholoŋ, ette isyarana adwaran jyo oloŋ iswahiniere laati te eema.
\v 9 Tania amadai laati ta anahan on obolo bebe ette isi moryo afure Hollum Adwarani al ifahu’to ettigemita hunia. Bwo fe obeŋi isi iloiti atajya hosi itahabuyere inyi.
\p
\v 10 Ijuhok anjelo etamiete erre hutto sahan honyi ikurus ono acaŋ ette olobye honyi rahan edumele bwo ohonye laati etuhe hosi nyo obolo adyaha,
\v 11 ette isi moryo Hollum olo edou bwo iburaŋatye isi bebe nyo olwaji atoŋos jihosi. Ati obeŋi isi iloiti atajya hosi t’ehanita hosi.
\v 12 Ijuhok anjelo etaleji erre hutto sahan honyi ihari eneittok an ifurani Efarate ette itayoho aari ania ihuhumaniere ekoi jyo hobwok hul ofwonni adi t’ettedwoŋi holoŋ.
\v 13 Egonyu ni ajohin hunihoi hun orrohoji’to ihwa edodwohi hun ofwonni addi to hutuk munu, bwo to hutuk caŋ, bwo fe to hutuk hebwanani enyabani.
\v 14 Arai isi ajohin hun orrohoji’to hun ihanie’to etamijanita, bwo ofwoi isi jyo hobwok hulo afauhyen daŋ ittubaniere isi ta arrem iholoŋ eneittok ono Hollum Adwarani al agalik’to daŋ.
\v 15 Imijye, attu adi ni ihwa olohoho. Hotomunoi lya ol obeŋ’to ojotoro iko al irrirrya’to aboŋojin honyi ŋadi inyi adaha aŋaturoi bwo igonyuni laati inyi ette inyi iloriri.
\v 16 Ottubanie hobwok jyo amaji an ifurani te nekyana Ebrei, Amagado.
\p
\v 17 Ijuhok anjelo etahattarihi erre hutto sahan honyi iloyyami. Teyya teyya ottu nekyana on okwat bebe to maji on odwa’to bwo to kurus on ojo, Atuhuno.
\v 18 Ihalu erre hunia owoni emedehita hilai, nekyanita, etitta hide, bwo fe ekikiro fau on obolo bebe agalik ninya beryen hamanyai laati ifau.
\v 19 Tania obwanya Babolona amiji eneittok aŋaco hunihoi bwo okwaharai amisihi huno paganohyen. Tania ogilu Hollum Babolona jo ijara hatamata ta akos ono ajore honyi on obolo’to.
\v 20 Olitohini nafuli daŋ addi bwo fe obeŋi adoŋyok oleye.
\v 21 Abahye afalaŋa hun obolori’to laati bwo fe odiŋ afalaŋati abotye ihwa arotol atomwana miet. Tania omorye laati Hollum nyo ittigemye afalaŋa isi bwo obolo bebe ettigemyo ania.
\c 17
\cl Angati 17
\p
\v 1 Ottu anjelo abotye olo hulo hattarik hyodwo owoni iko asahani hattarik ette inyi ikyana jihoŋ ojo, Waŋ dini, etahutak adi ni iye aŋoco ono asomoni eneittok an itoŋo’to jyo aryak arryai.
\v 2 Orotoi hobwok hulo afau ikonyi bwo fe orumai hya hul amanyai ifau ta aari ajalaŋi huno esomiti honyi.
\p
\v 3 Attati anjelo iyaro ani imur to Oloyiri bwo egonyu ni obo aŋotte an itoŋo’to ihorwoŋ caŋ on odo’to bebe. Ifut acaŋ iko emoriti bwo owon inyi iko osi hattarik iko amwarrak ’tomon.
\v 4 Iyyafak aŋotte aboŋo on odo’to bwo fe iryok. Iyyafak inyi bwo fe nayyel iko onoroi hun opipyahi’to iko hun obwori. Inef inyi ihani honyi akos ono nayyel an ifut iko arrohojita iko erre hun iboti’to huno esomiti honyi.
\v 5 Igyoroni ihomom honyi afure on ogol te etaniŋuna on ojo, Babolona eneittok, honye somok iko ono esomiti hutta fau.
\v 6 Egonyu ni aŋotte ania on oruma ta nooto ono aati Hollum iko ono etamijanak hulo Yesu. Al egonyu ni inyi ette ni illilliha bebe.
\p
\v 7 Ojo anjelo jihoŋ ojo, Nyo illilliha iye? Etahutak adi ni jihoi awoyo hiram on ogol’to ono aŋotte bwo fe ono acaŋ an iyaro’to aŋotte; inyi acaŋ on owon iko osi hattarik bwo amwarrak ’tomon.
\v 8 Isu dwo acaŋ odwo igonyu iye ati ihwania abeŋ. Ojiŋu adi inyi t’ewure on obeŋ iko esidi bwo olo adi inyi ihima. Illillihai adi laati hutta fau hul obeŋi igyoroni afureta hosi ibuk ono nesu many t’etteri fau. Illillihai adi isi al igonyuni isi acaŋ, nyo amanya nya inyi ati ihwania abeŋ, bwo ocohuno adi inyi.
\v 9 Awak eram ana ofyoro. Arai osi hattarik hunia adoŋyok hattarik hun itoŋori aŋotte.
\v 10 Arai bwo fe isi ahobwok hattarik. Okwaharai nya hulosi miet, ara abotye eleittok bwo hobeŋ obotye oleyo. Lattu inyi itoŋo adi inyi kai hama.
\v 11 Acaŋ an amanya nya ati ihwania abeŋ, ara inyi hobu etahottohunihi ati ara inyi olo hobwok hattarik bwo olo adi inyi ihima.
\v 12 Ojo anjelo bwo fe, Arai amwarrak ’tomon hodwo igonyu iye ahobwok ’tomon hul hobeŋi ifwotuni olobyehyen hosi; ati isyori adi elaballok jihosi ilettohori laati arabotye iko acaŋ ta asaa abotye.
\v 13 Owoni isi iko egigilo abotye bwo isyori isi adwaran hosi iko elaballok hosi jyo acaŋ.
\v 14 Orryomonie adi isi iko Lonyo ker ati iyyala adi Lonyo ker isi, nyo ara inyi Hobu al agalik hobwok daŋ bwo Eleittok al agalik eleittaha daŋ. Bwo fe iyyalari adi hya hul owoni’to ikonyi; isi hya hunya odihuni ettigemita fur nyo iloŋu Hollum isi bwo fe onyimu isi.
\v 15 Ojo inyi bwo fe jihoŋ ojo, Aryak hodwo igonyu iye hun itoŋori asomoni, arai isi olobyehyen, eluluŋ wati arryai, afauhyen, iko nekyanita wati daŋ gele gele.
\v 16 Acaŋ on owon iko amwarrak ’tomon hodwo igonyu iye hun arai’to ahobwok ’tomon oliwarik adi isi asomoni bwo fe itajiriŋye adi isi inyi ette iyaro aboŋojin honyi addi. Ohonyai adi isi ahwan ŋotte ania ette swahina ihima.
\v 17 Nyo isyo Hollum itajya hosi ihananiere awahan honyi te egigilo hosi arabotye, bwo isyarani isi adwaran hosi jyo acaŋ many osirunierek nekyanita Hollum.
\v 18 Aŋotte odwo igonyu iye, inyi amiji eneittok an itamanyayo’to hobwok hutta fau.
\c 18
\cl Angati 18
\p
\v 1 Ihalu erre hunia egonyu ni anjelo obo isuru t’edou ol owon iko adwaran on obolo’to bwo fe itafaŋ akwatan honyi afau.
\v 2 Ikyana inyi on okwat bebe ojo, Akwaharo, akwaharo Babolona amiji eneittok. Ofwonni ajohin manya dia. Amanyai oloyirihyen hun iboti’to dia. Amanyai aheny daŋ hun iboti’to iko hun orrohoji’to dia.
\v 3 Amatai laati hutta fauhyen daŋ aari ajalaŋi ono ajore honyi iko esomiti honyi. Orotoi hobwok hulo afau ikonyi, abarai akawajahyen hulo afau ta arrohojita honyi.
\p
\v 4 Etaniŋu ni etuk obo t’edou ojo, Laati hoŋ ifwanna addi jihonyi, Ŋadi itai irryahati iko eyyata honyi, ngadi bwo fe irryahati iko ettigemita honyi.
\v 5 Nyo ofonio inyi eyyata honyi many afanyarik isi idou Bwo agilu Hollum arrohojita honyi.
\p
\v 6 Isyatta jihonyi ihwa isyo inyi. Inienuna enyyahita arrihai te ehanita honyi, Bwo fe iharutonia amat enyyahita arrihai ikos honyi.
\v 7 Itahuyo inyi ahwan honyi bwo amanya inyi ta arrohojita, Tania isyatta jihonyi adyaha iko ettigemyo on osiru jihonyi. Nyo igigilo inyi itaji honyi ojo, Ani hobu, Obyaŋara ani ehidak bwo abeŋ adi ni amijak edyahita.
\v 8 Tania to oloŋ abotye ofwonni adi ettigemita honyi, Isi huna: eŋwati, ayyo iko ahure, Bwo fe oswahini adi inyi te eema Nyo ogol Hobu Hollum ol oŋot’to inyi bebe.
\p
\v 9 Hobwok hulo afau hunya orotoi’to ikonyi ette manya ta ayiranita honyi oyyoi adi isi tenyi al igonyuni isi afuro ono aswaharo honyi.
\v 10 Owotyai adi isi alamarai nyo abaŋi isi ettigemyo honyi ette isi jaran, Orroho, orroho Babolona amiji eneittok, iye amiji en egol bebe, ta asaa abotye ottu aŋoco hoi.
\v 11 Oyyoi akawajahyen hutta fau tenyi ette buryo inyi, nyo ihwania obeŋ tulo inyyaŋa erre hosi.
\v 12 Owoni isi iko nayyel, abilat hun opipyahi’to, bwo onoroi hun opipyahi’to iko hun obwori, aboŋojin hun ilamani, hun emoliha, iko hun egarawaji, bwo hun odori. Owoni isi iko abauhyen hun ilamani bwo erre hun ihuhumi ta naalai tome iko te etoi, ta afelek, ta abilata iko ta amorwo.
\v 13 Owoni isi bwo fe iko amile, asitata, ottogoŋ, eyyali ono ahwan, arya, aari ajalaŋi, eyyali ono aŋiyo, efwa, ema, esuŋ iko akyoro. Bwo fe owoni isi iko akusani iko atoromilehyen, bwo apiti iko omuk laati.
\v 14 Ojori adi isi, Atuhunie aŋer hunya idaya iye attati nelaman hoi iko ebariti hoi byaŋarana bwo obeŋi adi inyyahi nyurana isi.
\v 15 Oyyoi adi akawajahyen hul itinyyaŋai erre hunia ette buryo inyi, nyo abarai isi ta amiji ania. Owotyai adi isi alamarai nyo abaŋi isi ettigemyo honyi.
\v 16 Ojori adi isi, Orroho, orroho jyo amiji eneittok; iyyafatyo nya inyi aboŋojin hun ilamani hun emoliha bwo odori; iyyafatyo inyi nayyel iko onoroi hun opipyahi’to iko hun obwori’to.
\v 17 Nyo ta asaa abotye otturoi ebariti hun obolori’to. Owotyai eleittaha hulo ababuri alamarai iko laati daŋ hul adahai’to ibaburi ojo bwo fe hya egyamak baburi bwo fe laati hul onyurani ebariti hosi te egyama ihari.
\v 18 Attati isi iwuwoŋita al igonyuni isi afuro ono aswaharo honyi ette jaran, Anani miji on orrijo’to iko amiji ana?
\v 19 Attati isi huco aboro ihosi hosi ette iwuwoŋita; oyyoi isi ette buryo inyi ojori, Orroho, orroho jyo amiji eneittok. Nyo onyurani laati daŋ hul owoni iko ababuri ebariti hosi jyo amiji ania nyo abara inyi. Ta asaa abotye itatturi inyi.
\p
\v 20 Edou, omunoi tenyi; aati Hollum, lefahat, bwo eyak sayyo, omunoti daŋ tenyi. Nyo inienu Hollum inyi tetai.
\p
\v 21 Iduhu anjelo al ilotir’to bebe amorwo an ara’to ihwa eryai eneittok ette bironia inyi ihari ette jaran, Irwoŋoni adi Babolona amiji eneittok ta agolon ihwa ana, bwo obeŋ adi inyyak leyo.
\v 22 Bwo obeŋi adi inyyahi itaniŋuna erribok dori iko etuhe hedolok bwo ahutak cuwalita iko aforojohyen. Bwo fe obeŋi adi inyyahi nyurana obo ehuhumani hirre, bwo obeŋi adi inyyahi itaniŋuna obo aŋotte iryeyo imiji hoi.
\v 23 Obeŋ adi allomo inyyak wulori imiji hoi bwo obeŋi adi inyyahi itaniŋuna obo etuk hayamani kuyya bu etuk hodwoti an hetehi yama. Nyo obolori nya akawajahyen hoi agalihini, bwo ta abwana hoi inyobyo nya iye afauhyen daŋ.
\v 24 Bwo fe onyurani jihonyi nooto ono eyak sayyo iko ono aati Hollum bwo ono laati daŋ hul ottohori’to to fau.
\c 19
\cl Angati 19
\p
\v 1 Ihalu erre hunia etaniŋu ni etuhe huno eluluŋ wati arryai hutte dou ojori, Aleluya. Owon etalahuna iko adwaran bwo akwatan jyo Hollum hohoi;
\v 2 Obisi eŋotiti honyi bwo arai isi ahode, Nyo oŋot inyi asomoni eneittok ninya itarroho’to afau te esomiti honyi, Bwo inienu Hollum nooto ono apiti honyi jyo aŋotte ania.
\v 3 Inyyahi isi jaran, Aleluya. Nyo adok afuro ono aswaharo honyi tulaŋ.
\q1
\v 4 Orubohoi amarwak atomwana arrihai haŋwan iko eyyeti aŋwan hun isui’to ifau ette isi itahabuyo Hollum al itoŋo’to ikurus ette isi jaran, Amen, aleluya.
\v 5 Ottu nekyana to kurus on ojo, Isyatta etahabuyo jyo Hollum hohoi itai apiti honyi daŋ, itai hul ibaŋata’to inyi, hul imutarata’to iko hul iboloroto’to.
\v 6 Bwo etaniŋu ni etuhe huno eluluŋ wati arryai hun arai ihwa etiri haryak arryai iko etitta hide ojori, Aleluya, nyo ara Hobu Hollum hohoi Eleittok bwo fe Adwarani al agalik’to daŋ.
\q1
\v 7 Ijara hohoi ewon iko amuno on obolo bebe bwo fe esyo akwatan jihonyi. Nyo attu asaa an ayamari Lonyo ker bwo ihuhum aŋottea honyi ahwan honyi.
\q1
\v 8 Iyyafak aŋotte aboŋo an ilaman, on opipyak bwo fe olibo. Itahutak aboŋo honyi ehanita hun obisi’to huno aati Hollum.
\p
\v 9 Ette anjelo ikyana jihoŋ ojo, Igyoroi, ijara hya hul iloŋuni jyo alomone ono Lonyo ker hotomunohi. Ojo inyi bwo fe jihoŋ, Nekyanita Hollum huna ahode.
\v 10 Aruboho ni ifau ihosyere hejek honyi itahabuyere inyi. Attati inyi jaran jihoŋ, Hehanio ihwania nyo ani apit ihwa iye iko illarak hoi hul owoni’to iko etamijani ono Kristo. Itahabuye Hollum. Nyo ara etamijani ono Yesu ihwa ekiluna ono erre hun ofwonni’to.
\p
\v 11 Imijye, egonyu ni edou aŋa, bwo ottu akusan on obwor teyya bwo ifurani lya al itoŋo’to ihorwoŋ honyi Olobijo iko Lahode, bwo ta abisan oŋot inyi bwo irrumita inyi.
\v 12 Arai oŋite honyi ihwa aŋadyefa hima hun owulori’to bwo owoni agoryai arryai ihou honyi. Igyoroni afure jihonyi on obeŋ tulo omijak arari inyi hama omijak.
\v 13 Iyyafak inyi aboŋo an ibuyai ta nooto, bwo afure honyi anya, Nekyana Hollum.
\v 14 Ijifatye oseŋer hutte dou inyi hul itoŋoi ikusani hun obwori’to bwo iyyafani isi aboŋojin hun ilamani, hun obwori bwo fe opipyahi.
\v 15 Ottu ademi on ofi’to to hutuk honyi bwo tenyi agalik adi inyi laati hutta fauhyen, bwo ilettohori adi inyi isi ta agolon. Omoco adi inyi aari ajalaŋi iwure an ara’to ihwa ajore on obolo’to ono Hollum Adwarani al agalik’to daŋ.
\v 16 Igyoroni afure iboŋo honyi iko ilohuya honyi on ojo, Hobu al agalik hobwok daŋ bwo Eleittok al agalik eleittaha daŋ.
\p
\v 17 Egonyu ni anjelo owotya iholoŋ ette inyi iloŋo on okwat jyo aheny hun idarrai’to idou ojo, Ifwanna, ottubaniete arabotye jyo akarama on obolo’to ono Hollum.
\v 18 Ifwanna iŋiyete ahiri hwattek hobwok, ahiri hwattek leittaha oseŋer, ahiri hwattek wati hul obolori’to, ahiri hwattek kusani iko laati hul itoŋoi’to ihorwoŋitek hosi, ahiri hwattek wati daŋ hul ifitani iko hul obeŋi ifitani, ojo bwo fe hul omutari iko hul obolori.
\v 19 Egonyu ni acaŋ iko hobwok hulo afau iko oseŋer hosi. Ottubanie isi irryomoniere iko lya al itoŋo’to ikusan iko oseŋer honyi.
\v 20 Attati isi inef acaŋ iko ebwanani enyabani linya ihanio’to etamijanita ihosyere caŋ inyobyere laati hul ifwotuni aridinyi honyi iko hya hul itahabuye’to arrijori honyi. Ibironi isi arrihai iwure ono eema leswoi; owulo eema ania bebe bwo fe onok.
\v 21 Ottohori laati hul arasai’to ta afere ono lya al itoŋo’to ikusan, inyi dwo afere on ojiŋu’to to hutuk honyi. Attati aheny ifoŋ ta ahiri hwattek hosi.
\c 20
\cl Angati 20
\p
\v 1 Egonyu ni anjelo isuru t’edou ol owon iko eŋanyit bwo aririk on obolo’to ihani honyi. Ara inyi eŋanyit ono ewure on obeŋ iko esidi.
\v 2 Inef inyi amunu inya owon’to beryen, inyi bwo fe etisyahani iko Sitan, ette anjelo ifitana inyi ta aŋasi alif abotye.
\v 3 Ibirok anjelo inyi iwure ihyanari bwo igafulok inyi ewure jo oŋida Sitan obeŋ inyyak inyobyo laati hutta fau many ottubarik aŋasi alif abotye. Ihalu aŋasi hunia obusuni adi inyi ta asaa kai.
\p
\v 4 Egonyu ni akurusi iko laati hul itoŋoi’to dia hul owoni iko adwaran iŋocere laati. Egonyu ni bwo fe laati hunya oŋuti osi hosi ta neruk hosi jyo Yesu, bwo fe ta nekyanita Hollum. Isi hya hunya obeŋi’to itahabuye acaŋ iko arrijori honyi bwo obeŋi isi ifwotuni aridinyi honyi ihomomite hosi, dwadi bu ihas hosi. Inyyahi isi isu bwo ilettohi iko Kristo ta aŋasi alif abotye.
\v 5 Ara ana nebuhuna etabotye. Obeŋi adi omuk layak inyyahi ibuhuna many ottubarik aŋasi alif abotye.
\v 6 Ijara hulya hul ibuhuni’to ta nebuhuna etabotye hotomunohi. Obeŋ naye etarrihi owon iko adwaran jyo hulya, ati arai adi isi ehumak hulo Hollum iko Kristo bwo fe ilettohi adi isi ikonyi ta aŋasi alif abotye.
\p
\v 7 Al ottubai aŋasi alif abotye obusuni adi Sitan to babus honyi.
\v 8 Ojiŋu adi inyi inyobyere olobyehyen wati daŋ hutta fau hul owoni iŋaco aŋwan huno afau hun iloŋoi Gog iko Magog ittuttubaniere isi irryomoniere. Ara ehenio hosi ihwa asuluŋayo otto otifor hari.
\v 9 Ofwonni isi to fauhyen daŋ ikoloniere amaji ono aati Hollum iko amiji en emuno hohoi. Ati odou eema t’edou itatturyere isi.
\v 10 Ibironi etisyahani al inyobyo’to isi iwure ono eema on onok’to bebe. Owon bwo fe acaŋ dia iko ebwanani lenyabani. Ittigemye adi isi bebe bebe ta afanni iko ta arwe daŋ fur fur.
\p
\v 11 Ihalu egonyu ni akurus on obolo bwo fe obwor bwo fe egonyu ni lya al itoŋo’to dia. Olitohini afau iko edou to homom honyi bwo abeŋ obo amaji tesi.
\v 12 Egonyu ni bwo fe layak wati; omuk hul eittaha, bwo fe omuk awati asai hul owotyai ihosyere kurus attati Hollum ŋa abuhi. Aŋai bwo fe abuk obo an ara’to abuk ono nesu. Oŋoti layak te erre hun igyoroni ibuhi ihwa osiruni ehanita hosi.
\v 13 Ofwonni layak addi to hari, bwo fe ofwonni isi to ye iko to Hadese, bwo fe oŋoti laati daŋ ababo te ehanita hosi.
\v 14 Attati ibironia naye iko Hadese iwure ono eema. Ara ewure ono eema ana naye etarrihi.
\v 15 Laati daŋ hul obeŋi afureta hosi igyoronie ibuk ono nesu ibironi isi iwure ono eema.
\c 21
\cl Angati 21
\p
\v 1 Ihalu erre huna egonyu ni edou aŋejuk iko afau aŋejuk nyo atuhunie edou iko afau etterita. Atuhuno bwo fe aari eneittok.
\v 2 Egonyu ni amiji on odwa’to inyi Yerusalem aŋejuk an isuru t’edou jyo Hollum. Olibo inyi ihwa odwoti an ilaman an itila habi honyi.
\v 3 Etaniŋu ni etuk on okwat bebe to kurus on ojo, Imijye, owon aji ono Hollum ihiji wati bwo amanya adi inyi ikosi. Arai adi isi awati honyi bwo itoŋo adi inyi ta ahwan honyi ikosi ette inyi rahan a Hollum hosi.
\v 4 Ifufus adi inyi neyyo daŋ to hoŋite hosi. Obeŋ adi naye inyyak wanan. Bwo fe obeŋi adi laati inyyahi tariha kuyya bu oyyoi bwo fe obeŋi omijani adyaha, nyo allaŋi erre etterita.
\p
\v 5 Ojo lya al itoŋo’to ikurus ojo, Imijye, etaŋejuk ni erre daŋ. Ojo inyi bwo fe ojo, Igyoroi, nyo oyiji nekyanita huna bwo fe arai isi ahode.
\v 6 Ojo inyi bwo fe jihoŋ, Atuhunie erre daŋ. Ani Alafa iko Omega, ani etteri iko esidi. Esyo adi ni jyo lya al iboto’to aari asai. Isi aari hun oŋeruni to tilik ono nesu.
\v 7 Lya al iyyala’to ara adi aharutani hirre hunia bwo fe ara adi ni a Hollum honyi bwo inyi olonyi hoŋ.
\v 8 Ati ta laati hul abaŋi’to bwo hul obeŋi’to iruhi, iko arrohojak, lattok, asomok, amurok, etahabwok ’rijorihyen iko agesemok daŋ; owon adi amaji hosi iwure ono eema on owulo’to an ara’to naye etarrihi. Yerusalem Aŋejuk
\v 9 Ihalu erre huna ottu anjelo abotye olo hulo hattarik hunya owoni iko asahani hattarik hun ifuti iko ettigemita hattarik esidita. Ette inyi ikyana jihoŋ ojo, Waŋ dini bwo etahutak adi ni iye odwoti an ara’to aŋotte Lonyo ker.
\p
\v 10 Attati inyi iyaro ani to Oloyiri jyo adoŋe on obolo bwo fe ohodo, bwo itahutak inyi jihoŋ amiji on odwa’to, inyi Yerusalem an isuru’to t’edou jyo Hollum.
\v 11 Owon inyi iko akwatan ono Hollum. Afaŋ inyi bebe ihwa onoro on opipyak’to on ogol te enyyaŋa bwo opipyak ihwa amiraya.
\v 12 Owon inyi iko ohitir on obolo bwo ohodo, bwo fe owoni ekatin ’tomon harrihai iko anjelohyen hosi ababo. Igyoroni afureta dia huno awoi wati ’tomon harrihai hulo lonyirok Israele.
\v 13 Ta aŋati edwoŋi holoŋ owoni ekatin hunihoi; ta aŋati ottowor owoni ekatin hunihoi; ta aŋati ottohide owoni ekatin hunihoi; ta aŋati eddorro holoŋ owoni ekatin hunihoi.
\v 14 Owoni awoi ’tomon harrihai ilohitiri miji. Igyoroni dia afureta ’tomon harrihai huno lefahat ’tomon harrihai hulo Lonyo ker.
\p
\v 15 Owon jyo lya al ikyana’to jihoŋ ekemit ono nayyel ikemyere amiji iko ekatin honyi bwo fe ohitiri.
\v 16 Ara ahodori honyi ihwa alatan honyi. Okemyo inyi amiji te ekemit bwo arai amail honyi esiha ’tomon homiet. Bwo fe orrijori ahodori honyi iko alatan honyi.
\v 17 Okemyo inyi olohitiri bwo ara ahodori honyi ayardahyen atomwana hattarik harrihai te ekemit ono atulo an ara’to ekemit an ikemyere anjelo.
\p
\v 18 Oduhoni ohitiri honyi ta amorwoi hun opipyahi’to bwo fe oduhoni amiji ta nayyel on olibo’to bwo fe opipyak ihwa amiraya.
\v 19 Itilamani awoi lohitiri miji to onoroi arryai hun olufaji, hun opipyahi’to bwo fe ogoli te enyyaŋa. Opipyak onoro etabotye ihwa amiraya, ara etarrihi emoli, ara etahunihi aboŋ, ara etaŋwani egara on opipyak’to,
\v 20 obwor etamieti iko aŋati honyi en emoli, ara etaleji aryet, ara etahattarihi asura, ara etahottohunihi egara, ara etahottoŋwani asura kai, ara etattomoni egara kai, ara etattomoni habotye emoli on opipyak’to, ara etattomoni harrihai emoli an afaŋ’to ihwa akarajaja.
\v 21 Arai ekatin honyi ’tomon harrihai onoroi ’tomon harrihai hun obwori. Ihuhumi ekatin daŋ to onoroi ababo. Ara ekoi miji ayyel on olibo’to an afaŋ ihwa akarajaja.
\p
\v 22 Abeŋ ni egonyu obo aji imojit imiji ania nyo Hobu Hollum Adwarani al agalik’to daŋ iko Lonyo ker arai isi aji imojit honyi.
\v 23 Obeŋ amiji ania awak afaŋan ono oloŋ kuyya bu ayafa nyo ara akwatan ono Hollum afaŋan honyi bwo ara Lonyo ker allomo honyi.
\v 24 Adahai adi laati hutta fauhyen ta afaŋan honyi bwo iyaunie hobwok hutta fauhyen akwatan hosi dia.
\v 25 Ta afanni obeŋi adi ihyanani ekatin miji ania bwo fe obeŋ obo arwe teyya.
\v 26 Iyaŋunie adi akwatan iko etahabuyo huno olobyehyen jyo amiji ania.
\v 27 Bwo fe obeŋ adi obo al ibot’to ojiŋak dia, kuyya bu lya al ihanio’to on orroho bwo fe ogesem. Ati ojiŋani adi hya hama hul igyoroni ibuk ono nesu ono Lonyo ker.
\c 22
\cl Angati 22
\p
\v 1 Ihalu erre huna itahutak anjelo ani olowore hari huno nesu hun opipyahi’to ihwa amiraya. Ottu inyi to kurus Hollum iko Lonyo ker,
\v 2 ette ŋetyo ettehiji hikoi miji an alat’to. Ta aŋati ana iko tole owon ayyani ono nesu on oŋiju aŋer ’tomon harrihai hun olufaji, bwo oŋiju inyi ayafajin daŋ. Oremehini abene ’yani ania itaŋida eŋwati wati hutta fauhyen.
\v 3 Obeŋ obo arrohoji teyya ati owon akurus Hollum iko ono Lonyo ker imiji ania. Itahabuye adi apiti honyi inyi.
\v 4 Igonyuni adi isi omom honyi bwo igyoroni afure honyi ihomomite hosi.
\v 5 Obeŋ obo arwe inyyak wanan dia bwo fe obeŋi laati awahi afaŋan ono allomo kuyya bu ono oloŋ nyo itafaŋ adi Hobu Hollum jihosi bwo ilettohorik adi isi fur fur.
\p
\v 6 Ojo inyi jihoŋ jo, Obisi nekyanita hunia bwo fe arai isi ahode. Ifak Hobu anjelo honyi itahutaniere jyo apit honyi erre hun ofwonni adi ihalu kai. Hobu alya inyi Hollum olo eyak sayyo.
\v 7 Imijye, attu adi ni kokwak. Ijara lya al ogotyere’to nekyanita huttotwa buk ana hotomunoi.
\p
\v 8 Ani Yoane alya al etaniŋu’to erre huna bwo fe egonyu isi, ette ni ruboho ihejek anjelo itahabuyere inyi linya itahutak’to erre hunia jihoŋ.
\v 9 Ojo inyi jihoŋ, Hehanio ihwania. Nyo ani apit ihwa iye iko illarak hoi eyak sayyo, bwo hya hul ogotyerek’to nekyanita huno abuk ana.
\v 10 Ojo inyi bwo fe jihoŋ ojo, Hemwanak nekyanita huno ekiluna huttotwa buk ana, nyo ilyaha asaa an itasirunierek adi isi.
\v 11 Lya ol orroho’to ijara inyi odulo ihanio arrohojita. Lya al ibot’to ijara inyi odulo ibot. Lya ol obis’to ijara inyi odulo ihanio abisan. Lya ol olibo’to ijara inyi odulo itoŋo ol olibo.
\p
\v 12 Imijye, attu adi ni kokwak bwo fe eyauno ni edumiti idumari jyo laati ababo ihwa osiruni ehanita hosi.
\v 13 Ani Alafa iko Omega, ani losyere iko lehalu, ani etteri iko esidi.
\v 14 Ijara hya hul illillai aboŋojin hosi hotomunohi nyo osiru jihosi ifwonniere jyo ayyani ono nesu bwo oremehini isi jiŋana ekatin miji.
\v 15 Owoni aŋohe ilet iko amurok, asomok, attok, etahabwok ’rijorihyen, iko laati daŋ hul omunoi agesemita bwo ikyanarik tesi.
\p
\v 16 Ani Yesu alya al efak’to anjelo hoŋ jihoi itahutaniere erre hunia jihoi ihiji klesyahyen. Ani Addeti olo Davide, ani bwo fe lonyi honyi. Ani bwo fe elelyef otto taŋatyo motye an afaŋ’to bebe.
\p
\v 17 Ojo Oloyiri, Ijara inyi hettu; bwo odwoti an ayamai adi ojo, Ijara hettu. Ijara lya al itaniŋu’to hejara, Waŋ. Ijara lya al iboto’to hetettu dini bwo fe lya al awak’to ijara inyi hatamata naari huno nesu ta abyaŋan idumit.
\p
\v 18 Eramyo ni laati daŋ hul itaniŋuni’to nekyanita huno nekiluna huttotwa buk ana jo, kuyya ofonik obo atulo omuk erre jyo nekyanita hunia, ofonik adi bwo fe Hollum jihonyi ettigemita hun igyoroni ibuk ana;
\v 19 kuyya bwo fe iya obo atulo omuk nekyanita addi huno nekiluna huttotwa buk ana, iya adi Hollum aŋati honyi addi to ’yani ono nesu iko to miji on odwa’to; b isi erre hun igyoroni ibuk ana.
\p
\v 20 Ojo lya al ikyana’to erre huna jo, Ahode, attu adi ni kokwak. Amen. Waŋ Hobu Yesu.
\p
\v 21 Ijara amehino ono Hobu Yesu hatawana jihatai daŋ. Isi hunia.