kvb_reg/53-1TH.usfm

\id 1TH
\ide UTF-8
\h 1 Tesalonika
\toc1 1 Tesalonika
\toc2 1 Tesalonika
\toc3 1th
\mt 1 Tesalonika
\c 1

\s (Salam ngan Ucapon Sukor Paulus)
\p
\v 1 Deri Paulus, Silwanus, ngan Timotius kepodo jemaat de Tesalonika, nyo ado delom Allah Bepa ngan delom Tuhan Yesus Kristus. Anugrah ngan damai menyertai kowe.
\p
\v 2 Kamie teros mengucap sukor kepodo Allah untok kowe segelo, ngan menyambot kowe delom doa-doa kamie,
\v 3 selalu mengingot pekerjaon iman, usaha kaseh, ngan ketekunon pengharoponme de delom Tuhan kite, Yesus Kristus, de hadopon Allah ngan Bapa kite.
\v 4 Dolor-dolor nyo dekasehi Allah, ketahulia behwa Nye lah memileh kowe.
\v 5 Sabab, Injil* kami hopi detong kepodome delom kato-kato bae, cuma jugo delom kuaso, delom Roh Kudus*, ngan keyakenon ponoh; upa nyo kowe ketahui urang-urang upamone kamie nie de antaro kowe, demi kepentengonme.
\v 6 Kowe lah menjedi urang-urang nyo meneladani kamie ngan Tuhan ulehnyo kowe nerimo firman delom neman penderitaon ngan sukacita deri Roh Kudus,
\v 7 empoknyo kowe menjedi teladan bage segelo urang pecayo de Makedonia ngan Akhaya.
\v 8 Sabab, derime firman Tuhan begamo bukon anyo de Makedonia ngan Akhaya, meloenko jugo de setiap tempat, imanme kepodo Allah lah tersebar sehinggo kamie hopi perlu mengehatokoh apo-apo lage.
\v 9 Sabab, mike dewek menceritokoh tentang kamie, upamone kowe menyambot kamie, ngan upamone kowe bebelek kepodo Allah deri behala-hal* untok melayani Allah nyo hidop ngan bonor,
\v 10 ngan untok menantiko kedetongan Anak-Nye deri surga, nyo lah Nye bangketko deri antaro urang mati, iyelah Yesus, nyo menyelamatko kite deri murka nyo nak detong.
\c 2

\s (Pelayanon Paulus kepodo Jemaat de Tesalonika)
\p
\v 1 Dolor-dolor, kowe dewek tahu behwa konjongan kamie kepodome hopi sio-sio.
\v 2 Walaupon kamie menderita sebelomnye, upa nyo kowe ketahui, deaniaya ngan dehino de Filipi, kamie memeleki keberanion de delom Allah untok memberitakoh Injil* Allah kepodome de tongoh nemannye perlawanon.
\v 3 Sabab, nasehat kamie hopi berasol deri kesosoton, kehopimurnion, apo deri kepalsuon,
\v 4 cuma upamone kamie lah desetujui Allah untok depecayokoh Injil, demikionla kamie mboekonye, bukon untok menyenangkoh mendesio, meloenko untok menyenangkoh Allah nyo menguji hati kamie.
\v 5 Kamie hopi pernah detong ngan kato-kato nyo merayu, upa nyo kowe ketahui, apo ngan dali demi keserakahon -- Allah adolah saksi kamie.
\v 6 Kamie jugo hopi ndelok pujion deri mendesio, beik deri kowe ataupon deri urang loen, meskipon sebagoi rasol-rasol Kristus, kamie pacok menontotnye derime.
\v 7 Sebeleknye, kamie besikap lemah lombot de antaro kowe, upa seurang indok nyo mengasoh ngan merawat anak-anaknye dewek.
\v 8 Jedi, delom kaseh sayong nyo gede kepodome, kamie endok memborikoh kepodome bukon Injil* Allah bae, meloenkoh jugo hidop kamie dewek ulehnyo kowe lah sangat kamie kasehi.
\v 9 Sabab, kowe ingot, Dolor-dolor, usaha nga begawe karas kamie, upamone kamie bekerjo siang ngan malom empoknyo kamie hopi menjedi bobon bageme sementaro kamie memberitakoh Injil* Allah kepodome.
\v 10 Kowe adolah saksi-saksi, ngan jugo Allah, betapa suci, bonor, ngan hopi celanye kamie hidop de antaro kowe nyo pecayo.
\v 11 Upa kowe ketahui, kamie menasehati, menghibor, menyoroh kowe maseng-maseng, upa seurang bepak kepodo anak-anaknye dewek,
\v 12 empoknyo kowe hidop sesuoi ngan kehendok Allah, nyo memanggel kowe ke delom kerajaon ngan kemuliaon-Nye dewek.
\p
\v 13 Kamie jugo selalu mengucap sukor kepodo Allah untok hal nie, behwa ketiko kowe nerimo firman Allah, nyo kowe dengor deri kamie, kowe nerimonye bukon sebagoi perkehatoon mendesia, meloenko upamone nyo seharusnyo, iyelah perkehatoon Allah, nyo sedang bagawe de antaro kowe, urang-urang pecayo.
\v 14 Dolor-dolor, kowe lah menjedi urang-urang nyo meneladani jemaat-jemaat Allah delom Yesus Kristus nyo ado de Yudea ulehnyo kowe jugo lah mengalami penderitaon nyo samo, nyo berasal deri urang-urang sebengesome dewek, upa nyo mike alami deri urang-urang Yahudi
\v 15 nyo lah membunoh Tuhan Yesus ngan jugo para nabi,* upa menguser kamie. mike hopi menyenangkoh Allah ngan memosohi segelo urang.
\v 16 Mike menghalangi kamie untok memboek kepodo urang-urang bukon Yahudi empoknyo mike pacok deselamatkoh. Upa iyelah mike teros memonohi doso mike, cuma murka lah turun atas mike seponohnye.
\s (Keendok Paulus untok Njongok Kembali Jemaat Tesalonika)
\p
\v 17 Dolor-dolor, setelah untok sementaro waktu kamie depisohkoh deri kowe -- secaro fisik, bukon secaro roh -- kamie semaken ndelok ngan amat betatap muka nganme.
\v 18 Sabab, kamie endok detong kepodome, bahkan ake, Paulus, sodah beberapo kalo, cuma Iblis menghalangi kamie.
\v 19 Sabab, siapokoh harapon, sukacita, apo mahkota kebanggaon kamie de hadapon Tuhan Yesus podo kedetongan-Nye? Bukonkoh kowe?
\v 20 Kowelah kemuliaon ngan sukacita kamie.
\c 3

\s (Kabar Beik deri Timotius tentang Jemaat de Tesalonika)
\p
\v 1 Ulehnyo iye, ketiko kamie sodah hopi tahan lage, kamie memotoskoh untok tinggol seurang diri de Atena,
\v 2 ngan mengirem Timotius, dolor kamie ngan pelayan Allah, ngan rekan sepekerja kamie delom Injil Kristus, kepodome untok menguatkoh ngan menasehatime berkoeton ngan imanme,
\v 3 empoknyo hopi ado seurang pon nyo degoyahkoh uleh penderitaon-penderitaon nie. Sabab, kowe dewek tahu behwa kite memang detentukoh untok iye.
\v 4 Bahkan, ketika kamie besamome, kamie teros-meneros memboritahume behwa kite nak mengalami penderitaon, ngan iye lah tejadi upa nyo kowe ketahui.
\v 5 Ulehnyo iye, ketiko ake hopi tahan lage, ake mengotos untok mengetahui imanme. Ake takot, kalau-kalau si penggoda lah menggodame ngan jerih lelah kamie menjedi sio-sio.
\p
\v 6 Hambok, kinie, Timotius lah belek kepodo kamie deri tempatme, ngan lah membewo kabar beik tentang iman ngan kasehme untok kamie, behwa kowe selalu menyimpan kenangon nyo beik nak kamie ngan rindu untok betemu kamie, upa kamie jugo rindu betomu nganme.
\v 7 Ulehnyo iye, Dolor-dolor, delom segelo kesusahon ngan penderitaon nie, kamie terhibur ulehme melalui imanme.
\v 8 Kinie, kamie hidop munye kowe togok togoh delom Tuhan.
\v 9 Sabab, ucapon sukor apokah nyo pacok kamie persembahko kepodo Allah ulehnyo kowe, sebagoi ganti segelo sukacita nyo kami rasoko de hadapon Allah ulehnyo kowe?
\v 10 Siang mallom kamie bedoa ngan bonor-bonor untok kamie pacok betemu lage nganme, ngan pacok melengkapi apo nyo maseh kurang podo imanme.
\p
\v 11 Kinie, biarlah Allah ngan Bepa dewek, ngan Yesus, Tuhan kite, nyo menuntun jelon kamie kepodome.
\v 12 Kironye Tuhan membuat kowe betumbuh ngan belempah delom kaseh nak seurang kepodo nyo loen, ngan nak segelo urang, upa nyo kamie lakuko kepodome.
\v 13 Kironye Nye menogohkoh hatime hopi becacat delom kesucion de hadapon Allah ngan Bepa kite podo kedetongan Tuhan kite, Yesus, besamo urang-urang kudus-Nye.
\c 4

\p Kehidupon nyo menyenangko Allah
\v 1 Akherny, Dolor-dolor, kamie memintak ngan menasehatime delom Tuhan Yesus empoknyo sodah kowe terimo deri kamie tentang upamone kowe haros hidop ngan menyenangko Allah, lakukolah iye lobeh lage.
\v 2 Sabab, kowe tahu perentah-perentah apo nyo kamie sampoykoh kepodome melaluo kuaso Tuhan Yesus.
\p
\v 3 Sabab, nielah kehendok Allah: pengudusonme*, behwa kowe haros menjouhkoh diri deri pecabulan;
\v 4 behwa kowe maseng-maseng tahu upamone menguasoi badanme dewek delom kekuduson ngan kehormaton,
\v 5 bukon delom gairah nyo ponoh nafsu upa urang-urang nyo hopi mengenal Allah,
\v 6 empoknyo jengon ado seurang pon nyo melanggor ngan menipu dolornye delom hal nie. Sabab, Tuhan adolah Pembelos deri segelo nie, upa nyo kamie beritahuko sebolomnye ngan kamie peringotko ngan songgoh-songgoh kepodome.
\v 7 Allah memantou kite bukon untok kehopikuduson, meloenko untok kekuduson.
\v 8 Ulehnyo iye, siapo pon nyo menolak ajaron nie, bukon menolak mendesio, meloenko menolak Allah, nyo memborikoh Roh Kudus-Nye* kepodome.
\p
\v 9 Hambok, tentang kaseh pedoloron, kowe hopi membotohko seurang untok menolesko kepodome ulehnyo kowe dewek lah diajor Allah untok saleng mengasehi.
\v 10 Bahkan, kowe lah melakukonye kepodo segelo dolor nyo ado de Makedonia. Cuma, Dolor-dolor, kamie memintakme ngan sangat empoknyo kowe melakukonye lobeh lage,
\v 11 ngan beusaholah untok hidop ngan tenang, uruslah uruson-urusonme dewek, ngan begawelah ngan tangonme dewek, upa nyo lah kamie perentahkoh kepodome,
\v 12 empoknye kowe pacok menjelonie hidop ngan pantas de hadapon urang-urang luor ngan hopi kekurangon apo-apo.
\s (Kedetongan Tuhan)
\p
\v 13 Dolor-dolor, kamie hopi endok kowe hopi mengetahui tentang urang-urang nyo sodah mati empoknye kowe hopi bedukacita upa urang nyo hopi memeleki pengharapon.
\v 14 Sabab, munye kite pecayo behwa Yesus lah mati ngan bangket kembali, kite jugo pecayo behwa Allah nak mengompolkoh mike nyo mati de delom Yesus besamo-samo ngan Nye.
\v 15 Kamie mengehatoko hal nie kepodome ngan firman Tuhan, behwa kite nyo maseh hidop, nyo maseh ado hinggo kedetongan Tuhan, hopi nak mendahului mike nyo sodah meninggal.
\v 16 Tuhan dewek nak turun deri surga ngan suaro, suaro deri penghulu malaikat, ngan suaro trompet Allah, ngan urang-urang nyo mati delom Kristus nak bangket lobeh dahulu.
\v 17 Kemudion, kite nyo maseh hidop, nyo maseh tinggol, nak deangkot besamo-samo delom awan-awan ngan mike untok betomu ngan Tuhan de udara, ngan demikionla kite nak selalu besamo Tuhan.
\v 18 Ulehnyo iye, hiburla sikok ngan nyo laen ngan kehato-kehato nie.
\c 5

\s (Besiaplah untok Kedetongan Tuhan)
\p
\v 1 Kinie, Dolor-dolor, menganai waktu ngan zamannye, hopi perlu detuliskoh kepodome.
\v 2 Sabab, kowe dewek bonor-bonor tahu behwa hari Tuhan nak detong upa pemaleng podo malom hari.
\v 3 Ketiko urang-urang bekehato, “Damai ngan aman,” kebinasaon nak detong atas mike secaro tiba-tiba, upa raso saket betino nyo nak melaherko, ngan mike hopi pacok melolosko diri.
\v 4 Hambok, Dolor-dolor, kowe hopi hidop delom kekolomon sehinggo hari iye nak mendetongi kowe upa seurang pemaleng.
\v 5 Kowe segelo adolah anak-anak torang ngan anak-anak siang. Kite hopi beasal deri malom apo kemolomon.
\v 6 Sabab iye, jengonlah kite tidur upa urang-urang loen, cuma ayoklah kite tetap tejago ngan waspada.
\v 7 Urang nyo tidur, tidur podo malom hari ngan urang nyo mabok, jugo mabok podo malom hari.
\v 8 Hambok, ulehnyo kite adolah anak-anak siang, ayoklah kite sadar, menganako beju zirah iman ngan kaseh, ngan memakoi ketopong pengharapon nak keselamaton.
\p
\v 9 Allah hopi menetapko kite untok mengalami murka, cuma untok mendepotko keselamaton melalui Tuhan kite, Yesus Kristus,
\v 10 nyo lah mati bage kite empoknye kite, entah tejago ataupon tetidor, pacok tinggol besamo-Nye.
\v 11 Ulehnyo iye, kuatkolah siko ngan nyo loennye ngan saleng membangunlah, upa nyo sedang kowe lakukon kinie.
\s (Nasehat Terakher ngan Salam)
\p
\v 12 Dolor-dolor, kamie memintame untok menghormati mike nyo begawe karas de antarome, ngan nyo memimpinme delom Tuhan, ngan nyo menegorme.
\v 13 Hargailah mik bonor-bonor delom kaseh ulehnyo pekerjaon mike.
\p
\v 14 Kamie mendorongme, Dolor-dolor, tegorlah mike nyo hidop besogon-sogon, kuatkolah mike nyo bekecik hati, ngan bersoborlah ngan segelo urang.
\v 15 Perhatikolah empoknye jengon ado urang nyo membelos kejahaton ngan kejahaton, meloenko selalu beusahalah melakuko nyo beik de antarome ngan untok segelo urang.
\p
\v 16 Besukacitalah selalu!
\v 17 Teroslah bedoa!
\v 18 Mengucap sukorlah delom segelo hal. Sabab, iyelah kehendok Allah bageme de delom Kristus Yesus.
\p
\v 19 Jengon memedomkoh Roh!*
\v 20 Jengon mengoleh rendah nubuat-nubuat!*
\v 21 Hambok, ujila segelo sesuatu! Pogonglah ape nyo beik!
\v 22 Menjouhlah deri segelo bentok kejahaton!
\p
\v 23 Empok, damai sejahtera Allah dewek mengodosko kowe segelonye. Kironye roh, jiwa, ngan badanme tepeliharo segelonye, hopi cacat podo kedetongan Tuhan kite, Kristus Yesus.
\v 24 Nye nyo memantou kowe iyelah setia, Nye pasti nak melakukonye.
\p
\v 25 Dolor-dolor bedoala jugo untok kamie!
\v 26 Borila salam kepodo segelo dolor ngan cium kudus.
\v 27 Ake memintame ngan sangat demi namo Tuhan, untok membacokoh surat nie kepodo segelo dolor de kion.
\v 28 Anugrah Tuhan kite, Kristus Yesus, menyertaime.