auto save

01/01.txt

@@ -0,0 +1 @@
+\v 1 Ti piree kan Buluj, shookno K iriti Yeesho, mo yeena shii in yooni mo an kaawi, birang in wak shii longku kpaalo po shinnyi Yen tomonno Yamma. \v 2 Shinnyi Yen Tomonno Yamma ye deewaanku milan yau ti fok me an-pigrani, kaa ye ballii ti ta ballan paarono Yamma me shaana. \v 3 Shinnyi Yen Tomon tene ti Ku Laani Yeesho Kiriti Fo-mina. Kaa ye shii po peenno Dauda.

01/04.txt

@@ -0,0 +1 @@
+\v 4 Pene kaa ye ti bi shaana Shoomni kunnga kan shii Laano Yamma birang in kumi kan shii ka kumen kping ti bi ilitni ti ta duwo. \v 5 Ti piree kan Kiriti Yeesho birang kan longku shommoni ye ne weyaan kunngu kan yee shiwo la an shuran longku nen ye memme ti shakki memme ku-buk ding longku shinui in min kumanju kan murku. \v 6 We te taa kama, ma me Yamma yeyaa ma man shiwo ma sheeno Yeesho Kiriti.

01/07.txt

@@ -0,0 +1 @@
+\v 7 We war shik me ti Rooma ding me Yamma leka kan in ye shinui mo yooju memmeni me shaana: Kunngu  kan twaalan shaari ye ti piree kan Yamma Fomu kama birang kan Fo-mina Yeesho kiriti mo deeju ti kuuma.

01/08.txt

@@ -0,0 +1 @@
+\v 8 Ka toom, Ne pammaa ti Yamma ti piree kan Yeesho Kiriti longkuuma ma ding, longku ti Ku sheero pi lishaari ma ti koo tong ti ku-buk. \v 9 Longku Yamma ye Ne ti Ku yuun shuran ti shii ka poshaarino dok ti bi kpaalo po shinnyi Ye Tomon we Laani, shii jimrono ye ya Ne ti sha toom ka sheero pirma. \v 10 Koddi ye ding Ne ta forin fok. Ne ti beng Yamma na, maa nyimmo sheeni, daa ta yooro yaau, nen we koddi wende nen waru shikma.

01/11.txt

@@ -0,0 +1 @@
+\v 11 Longku ne ti Ku dalak nen we shik ma, longku nen min ma manni kunngu shoom ye tei ta pee shik ma.\v 12 Nyimmonoi tene, kaman pee shik shaayi, na nen pee ma shik ma ka lishaarino, ma sheema man peeno shikno ka sheema.

01/13.txt

@@ -0,0 +1 @@
+\v 13 Ma molonno, ne leka man peni a sho dok ye ne nyimmaa war shik mam, pene sho gbe, (pene we foottu wende beelono foki), longku warannoi kulang nen kasshani ti taama kaa ye ne yuwaa ti shakki dogi mei Yawudaawam. \v 14 Ka tirano koo nong ti kuuno, she mei Yawudaawa kan me biino, kan she me shen kan she me dili. \v 15 Tenei ye na ne leka kping nen sheeroma shinnyi Yen Tomon, ma sheema me ti Rooma.

01/16.txt

@@ -0,0 +1 @@
+\v 16 Shinnyi Yen Tomon te a we duulo-shik ti piree kan nem, longku tei kumenno Yamma ye tei ti warin koo nong mo kunnga waraa we marku, ka toom ti Yawudaawa ka bi ti mei Yawudaawam. \v 17 Longku ti piree kan shii ye ti shuklo diyo dob ti piree kan lishaari we war lishaari, kaa ye ballii ya, "Mo dob-dob ti piree kan lishaari, ta yooni kan dwei."

01/18.txt

@@ -0,0 +1 @@
+\v 18 Longku tenei ye ti shukullu denno Yamma ti ku-dang, ti ku mei ti shi Yammam kan piire shuran memme me ti nummo ku kulli ka piire shuranju. \v 19 Longkunno te, wee ta dum penani ti ku shuranno Yamma ti kudam ti shikju, longku Yamma po kuunii ye shuklaan ti shinui.

01/20.txt

@@ -0,0 +1 @@
+\v 20 Longku kaa we po penani ti kuuno Yamma kan kumenni ye po-ding, a wee ta dum we shiki ka adom, pene yau ye kpiinan ku-buk shukilla we te ti kudam, ti dum jemlani ti ku wee kpiina ti shik wee kpiina. Longkuuno te, memme a kan manni koko po yippo dom! \v 21 Kaa ye shinui penaa Yamma, kaa tei shinui a shokro shii ti po sherini kaa Yammam. Kan ye kaa teerei, nang nyimmojui in yooro waani, poshaariju yei ti penim, in yooju dil.

01/22.txt

@@ -0,0 +1 @@
+\v 22 Kaa ye shinui teka ya shinui me an shen, pene shinui mei peno wem. \v 23 Shinui in paaroku shokranno Yamma yei ti murim ka yemman biro ye kaa pelle adeewe, kan we-ta-gun, kan po peen ma kuret kan she angojo,

01/24.txt

@@ -0,0 +1 @@
+\v 24 Longkunno te, Yamma in min shinui ta yuyyo peen piire dalak poshaariju, kan lo-shikju birang shinui in ti ya we duulo-shik ti shaayi. \v 25 Shinui shigan kullino Yamma in yooro shaba. Shinui in ti wawi ti wee kpiina, birang shinui in ti yuun shuran ye daa shinui yuwaai ti Mo an kpiya po kuuni, shi mo fooraa in shokro shii po-ding. Mo yooro kaa te.

01/26.txt

@@ -0,0 +1 @@
+\v 26 Longkuuno te, Yamma in min shinui ka yuyyo we dalak ye ti li duulan shik. Sherebju in paaroku kpomit shwiji kan paamun ye teerei dob-dob kaa ye yuunan ti kpiyan ku-buk, shinui in shiwon kpomit yei yu dob-dobum. \v 27 Kaa we te birang sheranku paarojui in shar nyimmojui, nang shwiji in dai po kpomani kan shereb ye teerei ye dob-dob kaa ye kpiinan. Shwiji kan shereb shinui in ti yuyyo we duulo-shik, kaa we te shinui in yeeru kelmo ti kuuju ye yuwaa dob-dob kan piire shuranju.

01/28.txt

@@ -0,0 +1 @@
+\v 28 Kaa ye shinui kuraaju deeju kan penanno Yamma, nang Yamma in min shinui ti ta piire nyimmo, kulang shinui in ya wee a nenno in yam.

01/29.txt

@@ -0,0 +1 @@
+\v 29 Shinui kemii kan kenni ya ween kpang ding, kan shek, kan gawa, kan piire nyimmo. Shinui kemii kan mwisshi, kan tuk niyo, kan nee, kan piire shubet, kan ding poshaari. Shinui me an sheero-shik. \v 30 Me an mal-fok, me an kura Yamma, me an kuwak, me an kpir ku, me an leu kuuju, me an nyimmo ya shek, mei ti yaaro fok me an pariju kan munin gbam. \v 31 Shinui a kan nyimmon kpangum, a ti kem deewankuujum, a kan lewanum, kan mei ti ya kunngom.

01/32.txt

@@ -0,0 +1 @@
+\v 32 Shinui penaa shorono Yamma ye ya ding mo ti yuyyo peen we te, nenna muro, pene a bara ya we te ye shinui ti yuyyina waanim, birang shinui sheeju ti dau gun peddi me an yuyyo ween shurme.

01/title.txt

@@ -0,0 +1 @@
+Po geyani 1

02/01.txt

@@ -0,0 +1 @@
+\v 1 Longkuuno te, ke mo an gee kelnyono mondok, ke kan manni koko po yippo dom, koo kei nong. Longkuuno te, koddi ye ke ti geen kelnyono mondok ke ti yai kelmo ti kuuko, longku kelnyo ye ke ti geen mondok kan te, teerei tei ye ke ti ya.\v 2 Min penaa kelmono Yamma dob-dob ti ku me ti yuyyo ween shurme te.

02/03.txt

@@ -0,0 +1 @@
+\v 3 Pene nyimmo te, ke niyo, gee ke po kuuko ke ti ya kelnye ye ke ti geen memme kan te! ke ti nyimmina ke ta shiyako ti kira kelmono Yamma ya? \v 4 Koo ke ti begii gbe kunnguno Yamma, kan ker shaari ni, kan ye shii a ti ya dawal den ti shikom ya? Duma, kei peno kunnguno Yamma ti yerikoi ka we waraa for-fok maa?

02/05.txt

@@ -0,0 +1 @@
+\v 5 Pene ka longku bang-ku ye ti ya kan bang poshaari ye ke kan te, ke ti gali ti kuukei kelmono Yamma ye ta dang kuuko darang denno Yamma, ta koddi ye ta shuklon kelmo te ye ti ku kpang poshaarino Yamma. \v 6  Yamma ta minani ti koo nong kaa ye koo nong yuwaan shuranni. \v 7 Ka me ti gassho shokran kan illo kan kerang yei ti fim. Tenei me yuwaa shuran kunngu ti ta ker shaari, teerei shinui me Yamma ta minin we shik shuranju ka kerang po-ding.

02/08.txt

@@ -0,0 +1 @@
+\v 8 Pene kaa she me an leu kuuju, mei ti min gba ti kullim bara ti shek, ta maan ti shinui ka den kan gban-ta- gongo. \v 9 Ka turmo kan taa shilibi ta gee kuuno koo nong ye ti ya shek, ka toomii ti Yawudaawa, kan ka bii ti mei Yawudaawam.

02/10.txt

@@ -0,0 +1 @@
+\v 10 Pene ding mo yuwaa shuran yen kpang, ta we shokran kan gba kan kuttan shaari, ka toomii ti Yawudaawa kan ka bii ti mei Yawudaawam. \v 11 Longku Yamma a mo an kaalim. \v 12 Me an shasshalau ding yei peno shubetno ye ti fokno Muujam, shinui ta koon shwal a gale kan shoroim, pene me ding me yuwaa shasshalau kan penan shoroi, ta yuun kelmo ti shinui kaa ye shoro tekan.

02/13.txt

@@ -0,0 +1 @@
+\v 13 Longku a bara yaaro shoro ye memme ta yooju me an kpang  poshaari ti toomno Yammam, pene bara me an min gba ti shoro teerei ye ta tewani ya shinui me an kpang poshaari. \v 14 Longku mei Yawudaawam, me  shinui a kan shorom, kama ye kaa tei, manni koddii shinui ti ya wee shoroi kunnga ya mo yu, dangan ye poshaariju minaan. Tenei shuklaa ya shinui mei kan shorom, shigaju shoro po kuuju.

02/15.txt

@@ -0,0 +1 @@
+\v 15 Shuranju shuklaa ya ka jimro ti ku we te, longku nyimmojui ti we shinui kan kelnyo manni kodii, ti manni koddii a ti we shinui kan kelnyom. \v 16 Longkuuno te, kaa ye Shinnyi Yen Tomoni ye ne ti yuun kaawii ye ti tewi, ta yooro kaa te Darang ye Yamma ti piree kan Kiriti Yeesho ye ta shiiron we ding ye lattii ti ta nyimmo memme.

02/17.txt

@@ -0,0 +1 @@
+\v 17 Oo, ke ye ke teka ka kei niyo Yawudaawa paa? Ke sheraako ti ku shubet ta fokno Muuja, birang ken ti ya diila ka diya shakkiko kan Yamma, \v 18 ken ti tewi ka ke penaa nyimmono Yamma, birang ke kan penan we ti ku shoro ye ke po shakin wee dob-dob. \v 19 Ke kan penani ye kei an toom me an fugum, aaro ti me dii ti ta dil, \v 20 mo an limmo ti me dili, birang an shubet ti me nyimmoju kaa we shibo, ke penaa birang ti ta shoroi ke kan penani kping kan dob-dob kulli, nang tene taaka diyo kerangkoi ka yee?

02/21.txt

@@ -0,0 +1 @@
+\v 21 Oo, ke mo an shuppo memme, ke ti shuppo kuuko sheekom ya? Ke  mo an ya kaawi ye yaa mo wessho ya jirii, ke ti ya jiri maa? \v 22 Ke mo ti tewi ya mo wessho shomaki, ke ti ya shomak maa? Ke mo an kura we-kuma-we, ke ti ya jiri ti ta mina yowo maa?

02/23.txt

@@ -0,0 +1 @@
+\v 23 Ke mo an dallam ka shubet ta fokno Muuja, kei daklo shommono Yamma ti bi yiu bi ya shubetni maa? \v 24 Kaa ye ballii, "Longkuuma Yawudaawa ye ti ya paaro bek ti shik shommono Yamma ti shakki mei Yawudaawam."

02/25.txt

@@ -0,0 +1 @@
+\v 25 Ma kei ti min gbai ti shoroi, karan-kuwo poshaariko kan we biiro. Pene ma bang kumo maa wee ke ti ya, ta yooro kaa kei kar-kuwokom. \v 26 An te maa guni, mei kar-kuwojum maa ti ya maa wee shoro teka ya mo yu, Yamma a ta shar shinui kaa me karaa-kuwoju maa? \v 27  Mei kar-kuwoju ti ta lo-shikum pene shinui in ti ya wee shoro kunnga ya mo yu, shinui ta yuuko kelmo, ke mo ke kan shoro balli-ballii, mo karaa-kuwoni birang, ar wende ken ti au shooko ta ku shorono Yamma!

02/28.txt

@@ -0,0 +1,2 @@
+\v 28 Longku niyo Yawudaawa yen kulli a niyo yei niyo Yawudaawa kaa ye she lo-shik bara waanim, birang kar-kuwo yen kpangi a kaa she lo-shik yei she karan lakatum. \v 29 
+ Onngoo, niyo yei niyo Yawudaawa yen kullii niyo Yawudaawa ti poshaari, birang karan-kuwo yen kullii karan poshaari, kaa te, wee shoom yuwaa, a ti bi shoro ye ballaam. Peen niyo te, ti beero kuunii Yamma, a la niyo dingum.

02/title.txt

@@ -0,0 +1 @@
+Po geyani 2

03/01.txt

@@ -0,0 +1 @@
+\v 1 Oo, we bi tewani ka kei niyo Yawudaawai tong? Wii bi karan kuwoi tong? \v 2 Ka we maa, ti koko ding! Ka toom, shinui Yawudaawa ye Yamma po kuuni minaan jooro bi paaro te yei weeno Yamma.

03/03.txt

@@ -0,0 +1 @@
+\v 3 Pene ma peddiju maa kum kan  lishaarim paa? Mal fokju ta liyani tomon fokno Yamma in yooro we waani ya? \v 4 A kaa we tem, koo la-wiiu, kpaaliyo ding mo Yamma yooni mo an yen kulli, la niyo in yooni an shaba. Kaa ye ballii ya, "longku in peni, paarokoi yen kulli, kan ke ta yek bangno koo nong, ye ke maa wannai ya shiire."

03/05.txt

@@ -0,0 +1 @@
+\v 5 Pene ma kenni dob mu kama maa ta shuklo dobno Yamma ti kudamum, kamai ta teu wen? Kama ta tewani kama ya Yammai mo an shaanam ye shii ma shiiro mu kama ya? (Ne ti yai paaro kaa ye la niyo ding ti ya.) \v 6 Kulli a kaa tem! koo la-wiiu! Maa kaa we te, Yamma ta shiiro ku bukii ka yee?

03/07.txt

@@ -0,0 +1 @@
+\v 7 Ma kenni kullino maa ta li kullino Yamma in peru kudam kping, in shiworo we shokro Yamma, Oo, longku wen we foottu wende ma ta shiirono ti ku ye ya nei mo an shasshalawi ya? \v 8  Maa kaa te, kamai ta sha toom ka ya shek longku in shiworo koko po we diya kunngu maa? Peddi memmei yei ti yuumu ding paaroti shikmu, shinui in tewi ya min ti tewi kaa te. Ta kelmo ma mee kaa ye yuwaa dob-dob in yuun ti shinui.

03/09.txt

@@ -0,0 +1,2 @@
+\v 9 Oo, ka yee? Kama Yawudaawa, kama yeka dogi memmei ya? Onngoo! koo la-wiiu! kama fuwaa po shukani kama ya niyo Yawudaawa kan moi niyo Yawudaawam, shin ding ku jal me an kelnye, birang shin ding ti ta gun kumen shasshalau. \v 10 Kaa ye ballii ya, 
+      "A doo manni niyoi ye dobum, a doo we koo dokum.

03/11.txt

@@ -0,0 +1,4 @@
+\v 11 A doo manni niyoi ye penaam, 
+    A doo niyo an gassho biino Yammam.
+     \v 12 Shin ding shiga ta bi ti Yamma. shinui shigaju mei a doo shuran kwi foki dokum. 
+     A doo niyoi ye ti ya diyo kunngum, onngoo, koo dok."

03/13.txt

@@ -0,0 +1,4 @@
+\v 13 "Goorokju kaa awan fok duwo.
+    Dakju shigaro shari dokko,"
+    Paaro ta fokju kaa dak piire shammam." 
+     \v 14 "Ta fokju kemii ka shaami kan kuwak-kuwak."

03/15.txt

@@ -0,0 +1,4 @@
+\v 15 "Shooju ti daulo ku waraa der dom.
+ \v 16 Piree shinui yikka ding, bara daklani kan taa-shilibi.
+ \v 17 Memme shurme shinui a peno do koko kuttan shaarim."
+  \v 18 "A doo shewo Yamma ti adoojum koo la-wiiu."

03/19.txt

@@ -0,0 +1 @@
+\v 19 Wende kama penaa wee shoroi teka, ti tewii ti me ti ta gunto. Tene yuwaaro kaa tei longku in beelo me an yippo do, birang in li ku-buk ti ta gun kelmono Yamma. \v 20  Kaa ye adoo mo ta diyani yaa diya moi kan kelnyo ti toomno Yamma ka longku jooro yiu bi we shoro tekam. Wee shoroi ti yai te, tei in shukilla ya ti niyo shasshalauni.

03/21.txt

@@ -0,0 +1 @@
+\v 21 Pene wende shuklaa mu kama koko po we diya dobno Yamma. Diya dob te a ti wei shik shorom, kaa ye shubet ta fokno Muuja kan yuyyan balila me an-pigra shinui jimraa shii. \v 22 Diya dob te ye ti piree kan Yamma, ti we tei ti bi lishaari ti taano Yeesho Kiriti ti me ding me an kumani. A doo kaalim.

03/23.txt

@@ -0,0 +1 @@
+\v 23 Longku koo nong yuwaa shasshalau, birang koo nong in kaano fooro shokranno Yamma. \v 24  Pene ti bi kunngu ye Yamma yuwaa ti koo nong, koo nong in we diya yei daklo wem ti toomno Yamma ti bi paaranku ye Kiriti Yeesho yuwaa.

03/25.txt

@@ -0,0 +1 @@
+\v 25 Yamma shunna Yeesho mo shiwani we shuwa po-paaro ye ta shar shasshalaumu kama, longku ti piree kan domni ta fuddo shasshalau memme ti bi lishaariju. Yamma yuwaa kaa we tei longku shii in shuklo diya dobni, longku ti ta ker shaarini ye shii waka dooni ka shasshalau ye yuyyaa milam. \v 26 Kaa te Yamma in shukilla ti ta koddi te ya shii po kuuni shii moi an diya dob, birang shii ti li ding mo kunnga kan Yeesho in we diya moi daklo wem ti toomno Yamma.

03/27.txt

@@ -0,0 +1 @@
+\v 27 Oo, ti ku wen ye kama ta ya roomoi? A doo wem! Longku wen waka roomoi? Ti ku jooro shoro ya? Onngoo, pene bara ti ku lishaari teere. \v 28 Longku min weyaa ti bi lishaari ye, ti we diya moi daklo we ti toomno Yammam, a longku yiu bi kumen shorom.

03/29.txt

@@ -0,0 +1 @@
+\v 29 Nang Yammai we Yawudaawa shin dokju ya? Duma shii a Yamma mei Yawudaawam ya? Kulli, shii Yamma mei Yawudaawam birang. \v 30 Ma, kulli, Yamma maa dok, shii ta shiiro karan-kuwoi ti bi lishaari, kan kenni karan-kuwoi ti piree kan lishaari.

03/31.txt

@@ -0,0 +1 @@
+\v 31  Nang kama waka shoroi ti bi lishaari ya? Koo la-wiiu! kan ye kaa teere, kama ti ku peenai biiroi.

03/title.txt

@@ -0,0 +1 @@
+Po geyani 3

04/01.txt

@@ -0,0 +1 @@
+\v 1 Oo, kamai ta tem wen ti kuuno Ibiraayi, shiimu kama ti ta lo-shikii? Penaai wen ti ku paaro lishaarii? \v 2  Ma Ibiraayi maa weyaa diya moi kan daklan-wem ti toomno Yamma, ti bi shuran niyo kan po wee ta yuun roomo kan te ta shii nang, pene a ti toomno Yammam. \v 3  Ballan paaro Yamma teka ya, "Longku Ibiraayi liyaa shaari kan Yamma, nang Yamma in maaro tenei diya dob ti piree kan shi."

04/04.txt

@@ -0,0 +1 @@
+\v 4 Wende shi mo ti ya shuran, wee ti anngon shii, pene kaa wee ta yiu-bi. \v 5 Pene niyo yei shereni ti ku shurannim, pene in shereni ti kuuno Yamma ye shii ti li moi kan peen poshaarino Yammam shinui in we diya mei daklo wem ti piree kan shim, ta shar lishaari niyoi tei kaa diya dobni.

04/06.txt

@@ -0,0 +1,3 @@
+\v 6 Tenei we Dauda nyimmaa ye yuwaa paaro ti ku kpang ye yuwaa ti niyo ye Yamma teka ya shii mo an diya dob. \v 7 Shii in tewi ya, 
+    "Me kan kpang ti kuujui me fuddaan shasshalau karijju, 
+    kan me mo teklaan shasshalauni. \v 8 Mo kan kpang ti kuuni niyo ye Fo-mina maaro kelnyonim."

04/09.txt

@@ -0,0 +1 @@
+\v 9 Kpang tenei taakai me karaa kuwoju waani ya, nangii kan me wau shuuro mei kar kuwojum ya? Wee min ti tewii te, "Gee Ibiraayi ye maaraa lishaarinii diya dob." \v 10 Oo, dumai ta koddi nan shire ye teka ya shii mo an diya dobi? Ye tidai kar kuwonim ya,  nangii ka bi karan kuwoni ya? Ai, aka bim, penei ye tidai kar kuwonim.

04/11.txt

@@ -0,0 +1 @@
+\v 11 Nang Ibiraayi in kar kuwonii, tenei in yooro teman jimro ti ku diya dob ye shii kan te, ta lishaarini, we tangna ti koddi ye shii an wau shuuro moi kar kuwonim. Longkuuno te, Ibiraayi in yooni fo me an lishaari kan Yamma, me sharaa shinui yaa me an diyo dob, kaa ye shinui a kar kuwojum. \v 12 Kaa tei Ibiraayi in shiwoni fowi ti me karaa kuwoju, mei a bara karan kuwoi waani ye shinui kan tem, Pene birang shinui in ti yiu bi dangan pi peen lishaari ye Ibiraayi kan te ye tidai kar kuwoniim.

04/13.txt

@@ -0,0 +1 @@
+\v 13 Deewanku te ye yuwaa ti Ibiraayi kan po-peenni ya ta tappo ku-buk, pene a ti bi shoro ye yuwaan ti shiim, nang bara diya dob te ye ti we ti bi lishaari. \v 14 Ma me an yiu bi shoro maa me ta tappo ku ku-buk, ai, lishaari niyo ta yooroi we waani, birang deewankuuno Yamma shigoro we waani. \v 15 Longkuuno te, deewankui wannai ti bi lishaari, longku piree a doo shorom, a doo ye po yuun murkum.

04/16.txt

@@ -0,0 +1 @@
+\v 16 Longkuuno te, deewanku sheerii ti ku lishaari te, Tenei longku in deero ti ku kunnguno Yamma, birang in pee bi ti po peenno Ibiraayi ding, a ti me ti ta gun shoro ku jaljum, pene kan me ding ti kumi kan kulli, kaa ye Ibiraayi yuwaan. Ibiraayii fomu kama ding. \v 17 Kaa ye ballii ya, "Ne liyaako ken shiwogo fowi buk po-buk gbe," Kaa ye peekan bi deewanku te ti toomno Yamma, mo Ibiraayi kunnga kan shii, mo shii birang ti min kerang ti me murooju. Birang shii mo kan kumen ye ta yeeru wee a yoojum in yooju.

04/18.txt

@@ -0,0 +1 @@
+\v 18 Kaa ye li-shaarino Ibiraayi kaa shigaro we waani, ding kaa tei shii in sha toom ka li-shaari, in ti kumi nang in yooni fowi buk po-buk gbe. \v 19 Ta koddi teere, Ibiraayi kan pelle sheno shig dok, pene shii a yooni duulan ta lishaarim, kama ye shii ti geena bangni kuugero longku kooro, birang kan Sharattu ye kookaro ti fok koddi ye tei ta dum pattani.

04/20.txt

@@ -0,0 +1 @@
+\v 20 Pene ka longku deewankuuno Yamma, Ibiraayi a yooni lakkidik ti ta kenni lishaarim. Kan ye kaa teerei, shiiknii in peero ti ta li-shaari kan kum-pinno Yamma. \v 21 Shii in deeni ti ta keman pee bi ya Yamma ta dum kem deewankuuni. \v 22 Longkuuno  tenei in maaron ti shii kaa diya dob ti piree kan shi.

04/23.txt

@@ -0,0 +1 @@
+\v 23 Pene paaro te ye ti tewi ya, "in maaro lishaarii diyo dob ti piree kan shii," a longkuuni shii dokni ye ballaam. \v 24 Pene ballaa we tei longkuumu kama, kama sheemu, ye Yamma ta maaro mu kamai me an diyo dob, kama ye kama kunnga kan mo shokraa Yeesho Fo-minamu kama ti ta duwo. \v 25 Tenei mo minaa shii ka longku shasshalaumu kama kan in shokirra ka we shiiro mu kama.

04/title.txt

@@ -0,0 +1 @@
+Po geyani 4

05/01.txt

@@ -0,0 +1 @@
+\v 1 Longkuuno te, kaa ye shiiraamu kama ti bi lishaari, kama kan kuttan shaari ti piree kan Fo-minamu kama Yeesho kiriti. \v 2  Ti piree kan shii kama weyaa ri ta kunngu te ye kama diin ti tai ti bi lishaarimu kama. Birang kaman ti ya beere longku kama liyaa shaari, ya kama ta yoomu me an diya gale ti ta shokranno Yamma.

05/03.txt

@@ -0,0 +1 @@
+\v 3  A bara kaa tem, ar kama ta ya beere ti ta taa shilibmu kama, longku kama penaa taa shilibti waru ka kurmani,\v 4  kurmani ti waru ka nyimmon kpang, nyimmon kpang birang ti waru ka lishaari. \v 5  Lishaari te a ta yooro we waanim koo la-wiiu, longku Yamma ti ukkurumu kama lewanni ti poshaarimu kama ti piree kan shoomni Yen kpang ye Yamma minnamu kama.

05/06.txt

@@ -0,0 +1 @@
+\v 6  Longku ta dob-dob koddi, ta koddi ye kamai ta dum shau kuumu kamam, kiriti in muri longkuumu kama, kama mei kan peen nyimmono Yammam. \v 7  Ta  ya shilib mondok in muri ka longku niyo ye kan diya dob. Pene kergum mondok ta dum ya bang poshaari, in muri longku niyo ye kan nyimmon kpang.

05/08.txt

@@ -0,0 +1 @@
+\v 8  Pene Yamma in shukmu kama gbe lewanni, longku tida kamai me an shasshalau, kiriti in muri longkuumu kama. \v 9  Oo, kaa ye kama weyaa diyo mei kan kelnyom ti toomno Yamma ti bi domno kiriti, pene kaa ye wende, ai ta dum marmu kama ti fok denno Yamma ti piree kan kiriti.

05/10.txt

@@ -0,0 +1 @@
+\v 10 Oo, kaa ye koddi ye milam kamai me an kenne kan Yamma ye limmaa shakkimu kama kan Yamma kan muro Laani, pene dogii wende ye shigan mun kama me an jeereno Yamma, ta marmu kama ka diyo Lai duma. \v 11  Nang kookaro ti fokno tei, birang min ti ya beere longku wee Yamma yuwaa ti piree kan Fo-mina Yeesho kiriti, mo ye ti piree kan shii ye limmaa shakkimu kama kan Yamma.

05/12.txt

@@ -0,0 +1 @@
+\v 12  Shasshalau riina ku-buk ti shik niyo dok, shasshalau te in yeeru muro. Kaa te muro in yooro we la niyon ding d’ing, longku koo nong yuwaa shasshalau. \v 13  Ye tidan in tang min shoroi, shasshalau ti ku-buk. Pene a ti maaro shasshalau ti piree a doo shorom.

05/14.txt

@@ -0,0 +1 @@
+\v 14 Kama ye kaa tei, muro in ya gub ti Ku memme ding we yinna ti ta koddino Adamu we war koddino Muuja, ye tei in ya kumen ti Ku shasshalauju me yei we teelo ta Ku shoro kaa ye sheeno Adamu diyaanum. Adamu tei temono mondok ye ta waru ka kunnguno Yamma. \v 15  Pene kunnguno Yamma ye minnai ti no ta warui dokro kping kan kelnyono Adamu. Gee shasshalau niyo dok te, yeena muro ti Ku memme gbe. Pene kunnguno Yamma yuwaaro gbe, ye kunngunii ye yuwaai ti bi kpang niyo dok te, ye yaa Yeesho kiriti, tei yeena gbong kpang ti memme gbe.

05/16.txt

@@ -0,0 +1 @@
+\v 16  Kulli kunnguno Yamma dokro ta tei kan shasshalau niyo dok te. Longku kelmo ye yinna bi kelnyo dok te, tei kelnye muro, pene kunngu ye Yamma minnai, tei yeenamu kama kelmo moi kan kelnyem ti toomnii kaa ye kama yuwaa shasshalau gbe. \v 17  Ti bi shasshalau niyo dok, yei Adamu, muro in ya gub ti kuuno koo nong, pene ya gub te a weenan dogum ye maa tengnga ka niyo dok, yei Yeesho kiriti ye wannan. Ti piree kan shii ye kama yikkan kpangno Yamma gbe kan kunnguni ta diya dob ti toomni. Ti piree kan shii kama ta ya gub ti ta diyo.

05/18.txt

@@ -0,0 +1 @@
+\v 18  Longkuuno te, kaaye kelnye niyo dok yeena kelmo muro ti kuuno koo nong, kaa te birang, yaan diya dob ye niyo dok yuwaa in waruka kpang ti koo nong, teerei we diya moi kan kelnyem ti toomno Yamma birang kan kerangin fo. \v 19  Kaa ye memme gbe yuwaaju me an shasshalau ti bi kenni murku niyo dok, kaa te birang memme gbe ta yooju me an diya dob ti piree kan murku niyo dok.

05/20.txt

@@ -0,0 +1 @@
+\v 20  Wee liyaa in riiru ka shoro tei longku kelnyo in peru peewe. pene koddi ye shasshalau tokka shaariro, nang kpangno Yamma ti yek tokko shaariro. \v 21  Teerei, kaa ye shasshalau yuwaa gub ti kuunii ti bi muro, kaa te birang kunnguno Yamma ti ku ya gubnii wende ti piree kan diya dob, in ti warin mun kama po we kerang po-ding ti piree kan Yeesho kiriti Fo-minamu kama.

05/title.txt

@@ -0,0 +1 @@
+Po geyani 5

06/01.txt

@@ -0,0 +1 @@
+\v 1 Kamai ta teu wen wendei? Kama ta shoomu toom ka diyo shasshalau kulang kunnguno Yamma in tokko shaariro ya?  \v 2  A kaa tem, koo la-wiiu, Ai, kama fuwaa po muromu kama ti piree kan shasshalau. Ka yee birang kama ta sha toom ka diyoni ti taaroi? \v 3  Duma, ma ding mai peno kama ding yuwaa mu kama yulma we war taano kiriti Yeesho, we war ta muroni ye yuwaamu kama yulma maa?

06/04.txt

@@ -0,0 +1 @@
+\v 4  Teerei, ti bi yaan yulmamu kama nanaamu kama gale kan shii, birang kaman yoomu dok kan shii ti ta muroni, longku kaa ye shokraa kiriti ti piree kan kumen te we shokranno Fowi, kaa te kama sheemu, kaman ya diyon fo. \v 5  Kaa ye kama yuwaamu dok kan shii ti ta peen muroni, kulli kama ta yoomu dok kan shii ti ta ilitni ti shakki me murooju.

06/06.txt

@@ -0,0 +1 @@
+\v 6  Kama penaa ye ya fuwaa po nan kooro nyimmomu kama ye milam gale kan shii, longku in wak kumen shasshalau te ye ti ta diimu kama. Yuwaa kaa tei longku kamai ta tokko shaari diyo shook shasshalawum. \v 7  Kaa ye ma niyo maa murooni, shii weyaa diyo po kuuni ti piree kan kumen shasshalau.

06/08.txt

@@ -0,0 +1 @@
+\v 8  Kaa ye kama fuwaa po muroomu ka shaayi kan kiriti, kama kunnga kama ta deemu kan shii birang. \v 9  Longku kama penaa ye shokraa kiriti ti shakki me murooju, birang a ta tokko shaari muranim, teerei ye muroi a kan dogi kumen ti kuunim.

06/10.txt

@@ -0,0 +1 @@
+\v 10  Muro te ye yuwaai, murooni sho dok waani longku shii belaa kumen shasshalau, pene diyo ye ti ku yaanii, ta yaanii ti ta diyo gale kan Yamma. \v 11  Kaa te birang, ma shar kuuma kaa me kumai ti bi kumen shasshalau, pene me kan dwei ti shakki diyo gale kan Yamma ti biino kiriti Yeesho.

06/12.txt

@@ -0,0 +1 @@
+\v 12 Longkuunote, mo ma kumu shasshalau in ya gub ti ta lo-shik ma ye ta muroroi, ye ta liima man yiu bi piree dalak nyimmo la niyon dingi. \v 13  Birang mo ma min ku gul-ku shik ma ka we ya shasshalawi ye ta yooro shari yuyyo sheki. Nang bara ma min kuuma ti Yamma ye nennaa me foraa shinui ti ta kira muro we war we kerang, birang ma min kuuma ti Yamma longku in yooju shari shuran diya dob. \v 14  Mo ma kumu shasshalau in ya gub ti kuumam, kaa ye a doo shoro ye ta ya kumen ti kuumam, bara kunnguno Yamma.

06/15.txt

@@ -0,0 +1 @@
+\v 15 Wowen dumai? Teerei, nang mo kama yu shasshalau longku shoro a kan kumen ti kuumu kamam, bara kunnguno Yamma ya? Oonngoo! koo la-wiiu! \v 16 Mai peno maa, ye mam maa minaa kuuma longku man shiwoma me an murku ti mondok, teerei ye ma shiga ma shook ta kira mo wende ma ti murunku ti shii ya? Ma ta dum shiwo shook shasshalau, ye ti warin niyo kaara muro,  koo birang me an murku ti Yamma, ye ti warin niyo diya dob.

06/17.txt

@@ -0,0 +1 @@
+\v 17 Pene pammani mo yooro ti Yamma, longku kaa ye milam mai shook shasshalau, pene wende ma ti Ku murku ka poshaari ma ding ka peen shubet te ye yuwaa ma. \v 18 Piddaa ma ti ta shasshalau, birang man shiwo ma shook diya dob.

06/19.txt

@@ -0,0 +1 @@
+\v 19 Ne ti yuuma paaro kaa ye la niyon ding ti yuun paaro, tenei longku kenni bang ma ti ta nyimmo lo-shik. Milam fokma turmaaro ka min Ku gul-ku gul ma ka we wau we doon, birang we shek ye tei ti tokko shaariro waani. Pene wende nang ma min kuuma ti wawo diya dob, teerei longku ya shuran yen shaana.  \v 20 Koddi ye mai shook shasshalau, a doo we taaka ma ka shuran diya dobum. \v 21  Ma weyaai ween kpang wen ti shik we te ye wende shinui yuwaaju we duulan shik mai? Ai, we bi ween shurme tei muro!

06/22.txt

@@ -0,0 +1 @@
+\v 22 Pene wende piddaa ma ti ta shasshalau, birang man shiwo ma shookno Yamma. ween kpang ye ma ti we ti bi we tei shaano diya ma. Ye tei ta patto ma kerang po-ding. \v 23 Longku we bi shasshalawi muro, pene kunnguno Yammai kerang po-ding ti piree kan kiriti Yeesho Fo-minamu kama.

06/title.txt

@@ -0,0 +1 @@
+Po geyani 6

07/01.txt

@@ -0,0 +1 @@
+\v 1 Oo, ma molonno, kaa ye kama dingii me an pen shoro, ma ta pen wee ne ta tewani. Shoro ti ya kumen ti Ku niyo ta koddi ye niyoi maa kan dooni waani.

07/02.txt

@@ -0,0 +1 @@
+\v 2 Dangan piri, maa paamun ye kan diyaa, shoro kpakaa tei ti mannaro ma shwijii maa kan dooni. Pene ma mannaro maa murooni, tei weyaa po kuuro ti kira shoro ye kpakkaa tei kan mannaro.\v 3  Longkuuno te, tei maa diga manni niyoi dokro, ye ma mannaro maa kan dooni, tatewani ya tei an shomak. Pene ma shwijii maa murooni, tei yuwaaro po kuuro kaa ye shoro dau diyaa tekan. Ma tei maa digaro manni niyoi birang, tei an shomakum.

07/04.txt

@@ -0,0 +1 @@
+\v 4 Longkuuno te, ma molonno, tenei temo ti kuuma. Murono kirirtiti ku biro sheewe liyaa man yooma kuma ta shoro, longku man ya ween kpang ti Yamma ti ta diya ma. \v 5 Kaa ye koddi ye kama ti ku diya nyimmo lo-shik, shoroi in ti shuulo piire dalak mu kama. Dalak mu kama teere, tei in yiu ya shuran ti ta diimu kama, shuranmu kama ding in pattomu kama muro.

07/06.txt

@@ -0,0 +1 @@
+\v 6 Pene wende duma kama weyaa pokuumu kama ti ta shoro, longku kama muraamu ti ta wee  kpkakaa mu kama. Longkuuno te wende kama ti ku wau Yamma ti ta diyo yen fo ti ta shoomni. Kooro wawo ye kama yuwaa ti balilan shoro kookaro.

07/07.txt

@@ -0,0 +1 @@
+\v 7  Kamai ta tei wen wendei? shoroi shasshalau ya? Kulli, a kaa tem! kulli a doo ye ne po penon shasshalawum, in maa ti bi shorom. Ka shoro ye teka ya, "Moko yu dalak weeno mondokum," ai ne daa peno wee ti tewi yaa dalakum. \v 8  Pene longku kumen te, nang shasshalau in we koko po shuulo peen dalak ti ta aano. Longku maa gale kan shorom, shasshalau kaa kuma.

07/09.txt

@@ -0,0 +1 @@
+\v 9 Milam ne kan dwei, nei peno shorom, pene bara ye ne penaa kumen, nang shasshalau inilloro kan dwei, nang nen murono. \v 10 Kumen te ye nunngan shii wanna ka kerang, birang in yeerino muro.

07/11.txt

@@ -0,0 +1 @@
+\v 11  Shasshalau weena koddiro, birang ti bi kumen in dokkono, birang in tukno. \v 12  Longkuuno te, shoroi po kuuroi we po shor shiki, kumeni birangii we po shor shiki, dob-dob, yen kpang birang.

07/13.txt

@@ -0,0 +1 @@
+\v 13  Teerei, ta tewani ya shoro te, ye tei yen kpang, tei yeenano, muro ya? A kaa tem! Koo la-wiiu! Yeenano we tei shasshalau in yeeruno muro, longku in pen dangan pi shasshalau. Teerei, ti piree kan kumen te shasshalau in peru kudam ka kpakan po piirero. \v 14  Min penaa shoroi we shoom. Nei mo an nyimmo lo-shik, shook waani ti kira shasshalau.

07/15.txt

@@ -0,0 +1 @@
+\v 15  Nei peno wee ne ti yam. Longku wee ne leka nen yai, ne ti yai tem, birang wee ne kuraai, teerei wee ne ti ya. \v 16  Ma wee ne ti ya teerei maa wee nei lewo nen yam, ne kunnga nang shoroi ween kpang.

07/17.txt

@@ -0,0 +1 @@
+\v 17 A ne po kuuno ye ti ya we tem, nang bara shasshalau te ye dii ta aano. \v 18  Ne penaa a doo ween kpang ye dii ta aanom, yei nyimmono she lo-shik. Longku ne kan nyimmo ya ween kpang, pene yaani kaa tei in yek piri ti kuuno.

07/19.txt

@@ -0,0 +1 @@
+\v 19 Ne ti ya ween kpang ye ne leka yaanim, nang ne ti yai bara shek ye nei lewo nen yam. \v 20  Wende ma nei ti yai wee nei lewo nen yam, tenei shuklaa a ne ye ti ya we tem, pene bara shasshalau ye dii ta aano ye ti ya. \v 21  Nang nen we, kulli, shigaro kpakan foki ye ma nei leka nen ya ween kpang, nang nen we shik shek nimmi kan ne.

07/22.txt

@@ -0,0 +1 @@
+\v 22 Longku ti ta aano, ti poshaarino shorono Yamma ti twaalono shaarino, \v 23 pene ti ku gul-ku gulno ne ti we kpakan fok dokro ye tei ti ya gei kan kpakan fok ye nyimmono sharaa. We te dakano ta tei ti kpakan fok shasshalau te ye tei dii ti ta ku gul-ku gulno.

07/24.txt

@@ -0,0 +1 @@
+\v 24 Dogii sheeno! Ne shiga we kunngo! Ta kauro nei nong ti ta lo-shik te ye ta warin nen kaara muroi? \v 25  Ne pammaa Yamma longku shii kauraano ti piree kan Yeesho kiriti fo-minamu kama! Longkuuno te, ne po kuuno ne ti wawii showroom Yamma ka nyimmono, pene ka nyimmono she lo-shik, ne ti wawii shoro shasshalau.

07/title.txt

@@ -0,0 +1 @@
+Po geyani 7

08/01.txt

@@ -0,0 +1 @@
+\v 1 Longkuuno te, a doo manni kelmo muro wende ti ku me ti ta diyo po moli kan kiriti Yeeshom. \v 2  Longku ti piree kan kiriti Yeesho, belan fok biro shoom te ye ti min kerang, tei foraano ti ta belan fok biro shasshalau kan muro.

08/03.txt

@@ -0,0 +1 @@
+\v 3 Longku wee shoroi ta dum yaanim longku kenni bang nyimmo lo-shik, teerei wee Yamma yuwaa. Yamma nang in shuru dok Laani ti ta peen lo-shik sheemu kama, yei she shasshalau longku in shiwoni we der domi longku shasshalau ti ta lo-shik. \v 4  Yamma yuwaa tenei longku shuran diya dob ding yeshoroi teka ya mo yu, shinui in we kemoro ti piree kan kama, kama ye a nyimmo lo-shik ye kama ti yam, nang bara she shoom. \v 5 Me  an diya nyimmo lo-shik, shinui ti li nyimmojui ti ku we lo-shik, pene me an diya shoom ti li nyimmojui ti ku wee shoom leka.

08/06.txt

@@ -0,0 +1 @@
+\v 6 Li nyimmo ti ku lo-shik, ti yeeru muro, pene li nyimmo ti ku shoom ti waru ka kerang kan kuttan shaari.\v 7  Mo ding liyaa nyimmoni ti ku we lo-shik, nang shii shiganii an geino Yamma, longku a ti min gbe ti shorono Yammam, birang a ta dumanim. \v 8 Me an diyo nyimmo lo-shik a doo koko ye shinui ta waa lo-shik kerangno Yammam.

08/09.txt

@@ -0,0 +1 @@
+\v 9 Kaa ma, a diyo nyimmo lo-shik yema ti yam nang bara she shoom, ma shoomno yamma maa dii ti poshaari ma. Ding moi kan shoomno kiritim, shii a sheeno kiritim.\v 10  Ma kiriti maa dii ti taama, kaa ye lo-shik ma ti ku koko muro longku shasshalau, shoomno Yamma in ti kpirin ka ma longku Yamma in yiu ma kaa me an diyo dob.

08/11.txt

@@ -0,0 +1 @@
+\v 11 Birang ma shoomno Yamma, ye shokraa Yeesho ti shakki kuma maa dii ti poshaari ma, oo, shi mo shokraa Yeesho ti shakki kumai ta min kerang tilo-shik ma yei an muro ti piree kan shoomni ye diiti poshaari ma.

08/12.txt

@@ -0,0 +1 @@
+\v 12 Longkuuno te, ma molonno, kama kan  wee yikka mu kama kaman ya, pene a peenno  ye kama ta yuun diyo ye nyimmo lo-shik lekam.\v 13  Longku maa nyimmo diyo lo-shik ye ma ti ya, ma ta muttani. pene maa ka kumen shoom yema tukan nyimmo ya shasshalau, ma tadee ma kan dwei.

08/14.txt

@@ -0,0 +1 @@
+\v 14 Longku me shoomno Yamma ti shuulo shinui, shinui shibono Yamma.\v 15  Longku shoomno Yamma ye mina ma a we wawom ye ma ta mee mai diyani kan shewom. Ongngoo, shoom tei we diyo shibono Yamma, birang ti piree kan shoom ye kama ti yoon Yamma, kaman ti tewi kama ya, "Abba! fowi!"

08/16.txt

@@ -0,0 +1 @@
+\v 16 Shoomno Yamma po kuuni gale kan shoommu kama in ti pee bi ya kamai shibono Yamma.\v 17  Kaa ye kamai shibono Yamma, kama shigamu me an sha po aa te. Kaa te, kamai me sha po aa kpangno Yamma birang kan me an jeere sha po aa te gale kan kiriti. Ma kama maa shuwaa shilibi ka shaayi kan kiriti, ta shokromu kama ka shaayi kan shii.